Mereıtoı aıasynda 500-den astam is-shara ótkizý josparlanýda
Úkimette Premer-Mınıstrdiń orynbasary Altaı Kólginovtiń tóraǵalyǵymen Sultan Beıbarystyń 800 jyldyq mereıtoıyn toılaý jónindegi jumys tobynyń birinshi otyrysy ótti, dep habarlaıdy Almaty-akshamy.kz.
Keńeske mádenıet jáne sport mınıstri Asqat Oralov, Parlament Senaty Áleýmettik-mádenı damý jáne ǵylym komıtetiniń tóraǵasy Nurtóre Júsip, ǵylym jáne joǵary bilim, aqparat jáne qoǵamdyq damý, oqý-aǵartý, syrtqy ister vıse-mınıstrleri jáne Astana, Almaty, Shymkent qalalary men oblystar ákimderiniń orynbasarlary, JOO rektorlary, tarıhshy-ǵalymdar, Jazýshylar Odaǵy, shyǵarmashylyq zıaly qaýym ókilderi jáne t. b. qatysty.
Otyrysta Sultan Beıbarystyń 800 jyldyq mereıtoıyn atap ótý jónindegi is-sharalar jospary talqylanyp, biraýyzdan bekitildi.
Mereıtoı aıasynda 500-den astam is-shara ótkizý josparlanýda, olardyń 50-ge jýyǵy halyqaralyq jáne ulttyq deńgeıde ótedi. Bul is-sharalar uly batyrdyń murasyn mádenı-tanymdyq jáne aǵartýshylyq baǵyttarda nasıhattaýdy kózdeıdi.
Máselen, Kaır qalasynda Sultan Beıbarys meshitiniń saltanatty ashylýy, Qazaqstannyń Mysyrdaǵy mádenıet kúnderi, Túrkistan oblystyq Sh. Qaldaıaqova atyndaǵy fılarmonıasynyń, «Súgir» ulttyq aspaptyq orkestriniń konserti ótedi.
Sondaı-aq TÚRKSOI halyqaralyq uıymymen birlesip Túrkitildes elderdiń aqyn-jazýshylarynyń shyǵarmashylyq jarysyn (múshaıra), Kaır qalasynan Túrkistanǵa ıslam óneri murajaıy qorynan «Mámlúkter dáýiri» jyljymaly kórmesin ótkizý josparlanyp otyr.
Keńes barysynda Premer-Mınıstrdiń orynbasary Altaı Kólginov bizdiń qundylyqtarymyzdy qurmetteý, ál-Farabı, Abaı, Beıbarys Sultan sıaqty alyp tulǵalardyń uly isterin dáripteý urpaqtar aldyndaǵy ortaq paryz ekenin atap ótti.