Saıysqa 132 sportshy qatysty
Áskerı-qoldanbaly sport túrlerinen Qarýly kúshterdiń HH spartakıadasy aıasynda Aqmola oblysy Shýchınsk qalasynda Qorǵanys mınıstrliginiń áskerı kolejiniń bazasynda armıalyq qoıan-qoltyq urystan chempıonat ótti, dep habarlaıdy Almaty-akshamy.kz.
Oǵan Qarýly kúshterdiń barlyq ásker túrleri men tekteriniń, óńirlik qolbasshylyqtarynyń jáne basqa da kúshtik qurylymdarynyń atynan 17 komanda quramynda 132 sportshy qatysty.
– Armıalyq qoıan-qoltyq urysynyń negizgi elementterin árbir áskerı qyzmetshi bilýi tıis. Óıtkeni, naǵyz jaýynger kez kelgen oqıǵada jáne qalyptasqan jaǵdaıda, qarýmen de, qarýsyz da qarsylasqa qarsy tura alýy kerek. Qazirgi jarystar sportshylarymyzdyń daıyndyq deńgeıiniń joǵary ekenin kórsetti, – dep atap ótti Qorǵanys mınıstrliginiń Apparat basshysy polkovnık Erbol Qumarbekuly.
Jarys qorytyndysy boıynsha komandalyq esepte 32039 áskerı bóliminiń quramasy altyn júlde oljalasa, kúmis – «Shyǵys» óńirlik qolbasshylyǵyna, qola – Desanttyq-shabýyldaý áskerlerine buıyrdy.
Jeke birinshilikte 57 kelige deıingi salmaqta 32039 áskerı bóliminiń áskerı qyzmetshisi maıor Aman Shákirtov, 62 kelige deıin – Desanttyq-shabýyldaý áskerleriniń jaýyngeri kishi serjant Aıdyn Nurıdınov, 67 kelige deıin – Áýe qorǵanysy kúshteriniń ofıseri aǵa leıtenant Jánibek Sábıt, 73 kelige deıin – 32039 áskerı bóliminiń namysyn qorǵaǵan maıor Vadım Fedoseev, 80 kelige deıin – 32039 áskerı bóliminen aǵa leıtenant Baqtıar Qojahmetov, 88 kelige deıin – 32039 áskerı bóliminiń sardary leıtenant Arman Ermenbet, 97 kelige deıin – Qurlyq áskerleri áskerı ınstıtýtynyń 4 kýrs kýrsanty Esbol Dosjan, 97 keliden joǵary – Qurlyq áskerlerine tikeleı baǵynysty bólimniń jaýyngeri efreıtor Elaman Qýatov jeńis tuǵyrlarynan kórindi.