Agrarlyq máseleler jónindegi Komıtettiń «Bıylǵy egindi saqtaý, ótkizý máseleleri jáne olardy sheshý boıynsha Úkimettiń jospary» taqyrybyndaǵy keńeıtilgen otyrysynda Aýyl sharýashylyǵy mınıstri Aıdarbek Saparov vedomstvo shaǵyn sharýashylyqtardan satyp alýdyń basymdylyǵyn belgileı otyryp, jańa eginniń astyǵyn tikeleı satyp alýdy uıymdastyrý týraly máseleni pysyqtap jatqanyn habarlady.
«Úkimet rezervinen 10 mlrd teńge bólý josparlanýda. Bul shara naryqty turaqtandyrýǵa jáne naryqtyq quny boıynsha 155 myń tonna astyq satyp alýǵa múmkindik beredi. 1 mln tonnaǵa jýyq aýqymdy satyp alý úshin 75 mlrd teńge kóleminde qosymsha qarjylandyrý qajet», - dedi mınıstr.
Astyqtyń ishki baǵasynyń tómendeýi kezeńinde azyq-túlik kelisimshart korporasıasy fermerlerge astyqty ıntervensıalyq satyp alý arqyly tıimdi baǵamen satýǵa kómektesedi, osylaısha fermerlerdiń shyǵyndaryn azaıtady.
Joǵary baǵa kezeńinde memlekettik operator astyqty un tartý, mal jáne qus sharýashylyqtaryna naryqtyq baǵadan tómen baǵamen ótkizedi, osylaısha túpkilikti ónim baǵasynyń ósýin tejeıdi.
Osylaısha, azyq-túlik korporasıasy óz qyzmeti sheńberinde forvardtyq kelisimsharttar men taýarlyq kredıtter berý, un tartatyn, mal jáne qus sharýashylyqtaryna arzandatylǵan bıdaıdy ótkizý arqyly naryqqa júıeli qoldaý kórsetedi.
Bul tetik AÓK damýyn yntalandyra otyryp, ekonomıkaǵa mýltıplıkatıvti áser etedi, sondaı-aq áleýmettik mańyzy bar azyq-túlik taýarlaryna baǵany turaqtandyrý túrindegi núktelik áleýmettik áser etedi.
Astyqty úzdiksiz eksporttaý boıynsha sharalar qabyldandy: astyqty tasymaldaýǵa shamamen 11,8 myń birlik astyq tasýshy jáne 16 myń birlik jabyq vagon tartyldy.
Jalpy, aǵymdaǵy jyldyń 10 aıynda QTJ 7,9 mln tonna astyq júkterin tasymaldady, onyń ishinde ishki qatynastar boıynsha 1,9 mln tonna jáne eksportqa 6 mln tonna jóneltildi.
Aıta keteıik, bul máseleler keshendi tásildi talap etedi, osyǵan baılanysty tıimdi sharalar qabyldaý úshin mınıstrlik barlyq múddeli taraptarmen pysyqtaý júrgizýde.