Memleket basshysynyń Jarlyǵymen 2022 jyl Balalar jyly bolyp jarıalandy.
Balalardyń qaýipsizdigi men olardyń ál-aýqaty búgingi Úkimet otyrysynyń basty taqyryptarynyń biri boldy, dep habarlaıdy Almaty-akshamy.kz.
«Búgin, 1 maýsym, Halyqaralyq balalardy qorǵaý kúni. Bıyl bul merekeniń qazaqstandyq balalar men ata-analar úshin erekshe máni bar. Óıtkeni Memleket basshysynyń Jarlyǵymen 2022 jyl Balalar jyly bolyp jarıalandy.
Barlyq kishkentaı balǵyndarymyzdy osy shýaqty merekemen quttyqtaımyz!
Balalarǵa qamqorlyq jasaý, olardyń quqyqtaryn qorǵaý – memlekettiń asa mańyzdy mindetteriniń biri», – dep atap ótti Álıhan Smaıylov.
QR Premer-Mınıstri birqatar naqty tapsyrma berdi Oblys ákimdikterine áleýmettik jaǵynan az qamtylǵan sanattaǵy balalardy saýyqtyrý sharalarymen, jazǵy demalyspen jáne bos ýaqyttaryn paıdaly ótkizýmen barynsha qamtý tapsyryldy.
Barlyq aýyldyq eldi mekende sport alańdaryn, balalardy damytý ortalyqtaryn jabdyqtap, oıyn-saýyq, mádenı is-sharalar uıymdastyrý qajet.
Densaýlyq saqtaý mınıstrligi shalǵaıdaǵy eldi mekenderde balalardyń densaýlyq jaǵdaıyna skrınıngtik jáne stomatologıalyq tekserýler júrgizý úshin jyljymaly medısınalyq pýnktterdiń jumys isteýine qatysty sharalar qabyldasyn.
Balalar quqyqtarynyń saqtalýyn qamtamasyz etý úshin Bilim jáne ǵylym mınıstrligi ákimdiktermen birlesip, óńir ákimdikteri janyndaǵy táýelsiz Bala quqyqtary jónindegi ýákilderdiń laýazymdaryn engizýdi tezdetsin.
Mádenıet mınıstrligi ishki týrızmdi damytý aıasynda balalar úshin ekskýrsıalyq-tanymdyq is-sharalar uıymdastyrsyn.
Balalardy úıirmelermen jáne seksıalarmen qamtý maqsatynda Bilim jáne ǵylym, Mádenıet jáne sport mınıstrlikteri, óńir ákimdikteri memlekettik bilim berý, sport jáne shyǵarmashylyq tapsyrystar boıynsha aqparattyq júıeler ıntegrasıasyn qamtamasyz etsin.