Jańa Úkimettiń alǵashqy otyrysy
QR Premer-Mınıstri Álıhan Smaıylov jańartylǵan quramda Úkimettiń alǵashqy otyrysyn ótkizdi, dep habarlaıdy Almaty-akshamy.kz Rrimeminister.kz-ke silteme jasap
Jańadan taǵaıyndalǵan Ulttyq ekonomıka mınıstri Álibek Qýantyrov, Indýstrıa jáne ınfraqurylymdyq damý mınıstri Qaıyrbek Óskenbaev, Energetıka mınıstri Bolat Aqsholaqov, Ádilet mınıstri Qanat Mýsın, Densaýlyq saqtaý mınıstri Ajar Ǵınıat, Aqparat jáne qoǵamdyq damý mınıstri Asqar Ýmarov memlekettik qyzmetshi antyn berdi.
«Búkil elimizdiń basyna aýyrtpalyq túsip turǵan qazirgideı kúrdeli kezeńde biz Memleket basshysynyń zor senimin aqtaýymyz kerek. Bizder – Úkimettiń jańa quramy, halyqtyń ómir sapasyn jaqsartýǵa, ekonomıkanyń ósimin saqtaýǵa jáne pandemıany eńserýge, lańkester men buzaqy-tonaýshylar keltirgen orasan shyǵyndardy qalpyna keltirýge, elimizdi jappaı daǵdarystan shyǵarýǵa baǵyttalǵan Prezıdent tapsyrmalaryn oryndaý úshin bar kúsh-jigerimizdi aıamaı jumys isteýimiz qajet. Bul – osyndaı asa aýyr jaǵdaıda áli eshqandaı Úkimettiń aldynda bolyp kórmegen óte kúrdeli de aýqymdy mindet. Halyq bizdiń jumysymyzdan naqty nátıje kútedi», - dedi Á.Smaıylov.
Otyrysta QR Prezıdenti Qasym-Jomart Kemeluly Toqaevtyń bıylǵy 11 qańtarda Parlament Májilisinde sóılegen sózinde bergen tapsyrmalaryn oryndaý jónindegi sharalar qaraldy.
Ulttyq ekonomıka mınıstri Álibek Qýantyrov, Ulttyq bank tóraǵasy Erbolat Dosaev, Qarjy naryǵyn retteý jáne damytý agenttiginiń tóraǵasy Mádına Ábilqasymova, Premer-Mınıstrdiń orynbasary – Saýda jáne ıntegrasıa mınıstri Baqyt Sultanov, Qarjy mınıstri Erulan Jamaýbaev, Indýstrıa jáne ınfraqurylymdyq damý mınıstri Qaıyrbek Óskenbaev, Aýyl sharýashylyǵy mınıstri Erbol Qarashókeev, Energetıka mınıstri Bolat Aqsholaqov, Ekologıa, geologıa jáne tabıǵı resýrstar mınıstri Serikqalı Brekeshev, Eńbek jáne halyqty áleýmettik qorǵaý mınıstri Serik Shápkenov, Densaýlyq saqtaý mınıstri Ajar Ǵınıat, Bilim jáne ǵylym mınıstri Asqat Aımaǵambetov, Aqparat jáne qoǵamdyq damý mınıstri Asqar Ýmarov baıandama jasady.
QR Premer-Mınıstri Álıhan Smaıylov Ulttyq ekonomıka mınıstrligine memlekettik organdarmen jáne uıymdarmen birlesip, bıylǵy jyldyń 20 qańtaryna deıin Úkimettiń 2022 jylǵa arnalǵan is-qımyl baǵdarlamasynyń jobasyn ázirleýdi, qysqa merzim ishinde SHOB-qa memlekettik qoldaý sharalaryn usynýdyń ashyq ári túsinikti tetikterin ázirleýdi jáne damý ınstıtýttary (QDB, «Damý» qory jáne t. b.) jumysynyń tıimdiligine taldaý júrgizýdi tapsyrdy. Úkimet basshysy Ulttyq ekonomıka mınıstrligine Ulttyq bankpen jáne «Atameken» UKP-men birlesip Inflásıaǵa qarsy áreket etý sharalarynyń keshenin ózektendirýdi, bir kózden alý tásilimen memlekettik satyp alý úlesin qysqartý turǵysynan «Samuryq-Qazyna» AQ satyp alý tártibin túbegeıli qaıta qaraýdy, «Samuryq-Qazyna» AQ men onyń enshiles kompanıalarynyń satyp alýdy júzege asyrýdyń búkil prosesin qaıta qaraýdy tapsyrdy. Ulttyq ekonomıka mınıstrligine Básekelestikti qorǵaý jáne damytý agenttigimen, Qarjy, Ádilet mınıstrlikterimen jáne «Atameken» UKP-men birlesip, bıylǵy jyldyń 1 aqpanyna deıin básekeles ortaǵa berýge jatatyn aktıvterdi irikteý tásilderin ázirleý, Úkimet qaýlysynyń tıisti jobasyn ázirleý jáne engizý tapsyryldy.
Ortalyq pen óńirler arasyndaǵy búdjetaralyq ózara qarym-qatynastardyń aıqyn qaǵıdalaryn qalyptastyrý maqsatynda Premer-Mınıstr búdjet zańnamasyna túzetýler toptamasyn daıyndaýdy jáne jalpy sıpattaǵy transfertterdi esepteý ádistemesin jetildirýdi tapsyrdy. Ulttyq ekonomıka mınıstrligine múddeli memlekettik organdarmen, batys jáne ońtústik óńirlerdiń – Aqtóbe, Almaty, Atyraý, Batys Qazaqstan, Jambyl, Qyzylorda, Mańǵystaý jáne Túrkistan oblystarynyń ákimdikterimen birlesip, «Aýyl – El besigi» baǵdarlamasy jáne basqa da salalyq baǵdarlamalar aıasynda jekelegen baǵyttar ázirleý tapsyryldy. Nur-Sultan qalasynyń ákimdigine Indýstrıa jáne ınfraqurylymdyq damý mınıstrligimen birlesip, LRT jobasyn odan ári paıdalaný nusqalary boıynsha naqty usynystar engizý tapsyryldy.
Úkimet basshysy ýtılızasıalyq alym máselesin iske asyrýdyń naqty tetikteri bar usynystar daıyndaýdy, munaı ónimderi naryǵyn retteý jóninde sharalar keshenin ázirleýdi, bir apta merzimde tıisti esepter júrgizýdi jáne benzın óndirýshiler men deldaldar úshin aksızder boıynsha kelisilgen usynystar engizýdi tapsyrdy.
Premer-Mınıstr bir aı ishinde óńdeýshi ónerkásip salasyn taldaýdy eskere otyryp, ekonomıkanyń básekege qabiletti sektorlaryndaǵy jobalar pýlyn daıyndaýdy, «Samuryq-Qazyna» AQ reformalaý boıynsha naqty usynystar ázirleýdi, kóktemgi egis jumystaryn sapaly jáne ýaqytyly júrgizý maqsatynda aýyl sharýashylyǵy ónimderin óndirýshilerdi materıaldyq-tehnıkalyq qamtamasyz etý boıynsha qajetti sharalar qabyldaýdy, Investısıalyq saıasattyń jańa tujyrymdamasyn ázirleýdi tapsyrdy. Á. Smaıylov İİM men TJM quqyq qorǵaý júıesin reformalaý jónindegi jumysty jalǵastyrýy qajet ekenin atap ótti. İİM-ge Ulttyq ekonomıka jáne Qarjy mınıstrlikterimen birlesip, bir apta ishinde Úkimetke İİM arnaýly maqsattaǵy bólimsheleri men Ulttyq ulandy sandyq ári sapalyq nyǵaıtý jóninde usynystar engizý tapsyryldy.
Úkimet basshysy polıseılerdiń quqyqtyq qorǵalýyn arttyrý máselelerin pysyqtaýdy, qarý aınalymy men dinı ekstremızmniń taralýyna baqylaýdy kúsheıtýdi, bir apta ishinde Úkimetke azamattyq qorǵaý organdaryn materıaldyq-tehnıkalyq jáne áleýmettik nyǵaıtý jóninde usynystar engizýdi, eldiń azamattyq qorǵanys josparyna qajetti túzetýler engizýdi, tótenshe jaǵdaı kezeńinde memlekettik materıaldyq rezervten materıaldyq qundylyqtardy shyǵarýdy jetildirý jóninde kelisilgen usynystar ázirleýdi tapsyrdy. Qorǵanys mınıstrligine Ulttyq ekonomıka, Indýstrıa jáne ınfraqurylymdyq damý, Qarjy mınıstrlikterimen birlesip, arnaıy bólimshelerdiń áskerı qyzmetshileriniń tabysyn arttyrý, áskerı-kólik avıasıasymen, qarý-jaraqpen jáne áskerı tehnıkamen jaraqtandyrý máselelerin pysyqtaý tapsyryldy.
Premer-Mınıstr Qarýly Kúshter men barlaý qurylymdaryn reformalaý, áskerdiń qorǵanys qabiletin túbegeıli arttyrý jóninde usynystar ázirleýdi jáne Qaýipsizdik Keńesi Apparatynyń jaqyn aradaǵy otyrysyna engizýdi tapsyrdy. Úkimet basshysy jumysqa ornalasýǵa jáne áleýmettik qoldaýǵa muqtaj azamattardyń naqty sanyn anyqtap, áleýmettik-eńbek salasyn sapaly jańartý boıynsha jumys júrgizý qajet ekenin atap ótti. Á. Smaıylov bıznes ıdeıalardy iske asyrýǵa arnalǵan granttar (400 AEK deıin) men eńbekaqy mólsherin ulǵaıtý, jastar praktıkasyna, «Alǵashqy jumys orny» jobasyna qatysý merzimin arttyrý boıynsha sharalar qabyldaýdy tapsyrdy.
Ulttyq ekonomıka, Eńbek jáne halyqty áleýmettik qorǵaý mınıstrlikterine bir aı merzimde halyqtyń tabysyn arttyrý jónindegi baǵdarlamanyń jobasyn ázirleý tapsyryldy. Bilim jáne ǵylym mınıstrligine múddeli memlekettik organdarmen birlesip, muǵalimder tapshylyǵy bar óńirler úshin áleýmettik qoldaý sharalarynyń tıisti paketimen pedagogtardy tartý baǵdarlamasyn ázirleý, bedeldi sheteldik joǵary oqý oryndarynyń 5 fılıalyn ashý jóninde sharalar qabyldaý tapsyryldy. Premer-Mınıstr memlekettik bilim berý tapsyrysy jobasynda tehnıkalyq baǵyttar boıynsha, birinshi kezekte, batys óńirlerde granttar sanyn ulǵaıtý, halyq tyǵyz qonystanǵan óńir jastarynyń joǵary oqý oryndarynda bilim alýy úshin nysanaly granttar kózdeý qajettigin atap ótti.
Úkimet basshysy bıylǵy 1 aqpanǵa deıin «Qazaqstan halqyna» qoǵamdyq áleýmettik qoryn qurý máselelerin pysyqtaýdy tapsyrdy.
«Búgingi jaǵdaıdyń qanshalyqty kúrdeli ekenin barlyqtaryńyz jaqsy bilesizder. Barynsha bir kisideı jumylyp, úılesimdi jumys isteýimiz qajet», - dedi Á. Smaıylov.