Bul týraly Prezıdent Úkimettiń keńeıtilgen otyrysynda aıtty.
«Qazir memleket búdjetiniń jartysynan kóbi áleýmettik salaǵa bólinip jatyr. Sońǵy jyldary áleýmettik saladaǵy ınfraqurylymdy damytý úshin biraz jumys atqaryldy. Áleýmettik sala mamandarynyń, ásirese pedagogter men medısına qyzmetkerleriniń bedelin arttyrýǵa basa mán berildi. Endi azamattarǵa kórsetiletin qyzmettiń sapasyn jaqsartý qajet. Bul – eń aldymen, densaýlyq saqtaý salasyna qatysty másele», - dedi Prezıdent.
Mindetti áleýmettik medısınalyq saqtandyrý júıesiniń iske qosylǵanyna 5 jyl boldy. Sodan beri bul salanyń búdjeti eki ese artty. Bıyl 2,6 trıllıon teńge bólinedi.
«Alaıda, medısınalyq kómektiń sapasy aıtarlyqtaı jaqsardy dep aıtýǵa bolmaıdy. Kóptegen qyzmet áli de qoljetimdi emes. Budan bólek, kóp jaǵdaıda resýrstar tıimsiz jumsalady. Sonyń saldarynan bul salaǵa qosymsha qarjy bólip, búdjetke salmaq salýǵa týra keledi. Úkimet medısınalyq saqtandyrý júıesiniń qyzmetin qatań baqylaýǵa alýy kerek. Bul júıe qarapaıym ári túsinikti bolýǵa tıis», - dedi Qasym-Jomart Toqaev.
Sonymen birge Prezıdent medısınalyq kómektiń biryńǵaı toptamasyn qalyptastyrý qajettigin aıtty.
«Memleket kepildik beretin medısınalyq qyzmet onyń bazalyq bóligi bolýǵa tıis. Kelesi bóligi jumys berýshiler men azamattardyń jarnalarynan quralatyn saqtandyrý qarajaty esebinen jasaqtalýy kerek. Jergilikti atqarýshy organdardyń jaýapkershiligin arttyrǵan jón. Áleýmettik jaǵynan osal toptaǵy keıbir azamattar úshin medısınalyq saqtandyrý júıesine aýdarylatyn tólemder jergilikti búdjetten bólinýge tıis», - dedi Memleket basshysy.