Prezıdent Qasym-Jomart Toqaevtyń qatysýmen Úkimettiń keńeıtilgen otyrysy ótip jatyr.
Byltyrǵy Joldaýynda Prezıdent úsh jylda agroónerkásip salasyndaǵy óńdelgen ónimniń úlesin 70 paıyzǵa jetkizý jóninde naqty tapsyrma bergen bolatyn, dep habarlaıdy Almaty-akshamy.kz.
Alaıda, Memleket basshysynyń sózinshe, bul baǵytta aýyz toltyryp aıtarlyqtaı jumys jasalyp jatqan joq
Prezıdenttiń pikirinshe, qazirgi tańda tek shıkizat óndirisine ǵana senip otyrýǵa bolmaıdy. Aýyl sharýashylyǵy ónimin óńdeýmen belsendi túrde aınalysý kerek.
«Úkimet osy máselege aıryqsha nazar aýdarýǵa tıis. Aýyl sharýashylyǵymen shuǵyldanam deýshiler sanyn meılinshe kóbeıtý kerek. Daqyl túrin kóbeıtip, eginniń shyǵymyn arttyryp jatqan dıqandarǵa jan-jaqty qoldaý kórsetken jón. Sondaı-aq, biryńǵaı jer salyǵyn qoldaný máselesin qaıta qarastyrý qajet. Sebebi, is júzine kelgende, biraz túıtkilder bar. Negizgi talap – salyq tóleýdi jeńildetý ǵana emes. Eń bastysy, sharýalar jerdi tıimdi paıdalanyp, barynsha mol ónim berýge umtylýy kerek», - dedi Memleket basshysy.
Sonymen birge, memlekettik qoldaý sharalaryn «bir tereze» qaǵıdasymen júzege asyrý qajet, ıaǵnı salalyq qarjy ınstıtýttarynyń qyzmetin bir jerge biriktirgen jón.
Agrarlyq nesıe korporasıasynyń áleýetin arttyryp, oǵan ákimdikterdiń aýyl sharýashylyǵyn sýbsıdıalaý quzyretin berý qajet. Ol úshin agroónerkásip kesheni sýbektilerine jeńildetilgen nesıe jáne sýbsıdıa berý qyzmetterin biryńǵaı sıfrlyq platformaǵa biriktirý kerek.
«Jalpy, agroónerkásip keshenine aýqymdy reforma jasalýǵa tıis. Naqty aıtqanda, jańa tehnologıalardy engizip, jerdi jáne basqa resýrstardy utymdy paıdalanyp, jeńildikter men sýbsıdıalardyń tıimdiligin arttyrý qajet. Munyń bári, túptep kelgende, aýyl sharýashylyǵyndaǵy eńbektiń ónimdiligin arttyrady, ıaǵnı naqty nátıje beredi», - dedi Qasym-Jomart Toqaev.