Óndiristi damytýǵa jáne jańǵyrtýǵa qajet ınvestısıa salynbaı jatyr. Bul týraly Úkimettiń keńeıtilgen otyrysynda Prezıdent Qasym-Jomart Toqaev aıtty.
«Úkimet halyqaralyq qarjy ınstıtýttarymen, transulttyq korporasıalarmen jáne otandyq kásipkerlermen aradaǵy syndarly dıalogty nyǵaıta túsýi qajet. Jalpy, elimizdiń bolashaqtaǵy ındýstrıalyq kelbeti qandaı bolady, qandaı kásiporyndar mańyzdy ról atqarady degen saýaldarǵa jaýap bolýǵa tıis. Iaǵnı, ýaqyttyń talabyna saı belsendi jumys isteý kerek», - dedi Qasym-Jomart Toqaev.
Prezıdenttiń aıtýynsha, kelesi mańyzdy mindet bul – qazirgi óndiris oryndaryn túbegeıli jańǵyrtý máselesi.
«Bul jumysty, eń aldymen, ábden tozǵan metalýrgıa kombınattarynan bastaý kerek. Óıtkeni, ondaǵy jaǵdaı óte nashar deýge bolady. Sebep – bárimizge belgili. Óndiristi damytýǵa jáne jańǵyrtýǵa qajetti ınvestısıa salynbaıdy. Sonyń saldarynan daıyn ónimniń qosylǵan quny tómendeıdi, sapaly jumys oryndary azaıady», - dedi Memleket basshysy.