Bul týraly Úkimet otyrysynda Premer-Mınıstr Álıhan Smaıylov aıtty.
Úkimet basshysynyń aıtýynsha, ótken qys mezgili jylý enegetıkasyndaǵy kóptegen problemalardyń bar ekenin kórsetti, dep habarlaıdy Almaty-akshamy.kz QazAqparatqa silteme jasap.
«Munyń barlyǵy – ákimdikterdiń kóp jyldar boıy jylytý maýsymyna nemquraıly qarap kelgendiginiń saldary. Ekibastuz, Rýdnyı jáne Rıdder qalalarynda jaǵdaı óte kúrdeli boldy. Ondaǵy máselelerdi kúni-túni baqylaýǵa alyp, shuǵyl túrde sheshýge týra keldi. Úkimettik komısıa qurylyp, jergilikti jerge baryp, jumys istegen jaǵdaılar da boldy. Atalǵan máseleler Úkimette birneshe ret qaraldy», - dedi Úkimet basshysy.
Premer-Mınıstr barlyq ákimdik budan qorytyndy shyǵaryp, mundaı jaǵdaıǵa qaıta jol bermeý úshin sapaly jumys isteý kerektigin basa aıtty.
«Ótken jylytý maýsymynda apattar sany aıtarlyqtaı artty. Tipti iri qalalardyń ózinde jylý energıasynyń jetpeı qalýy sebepti, ortasha temperatýrany tómendetip berýge týra keldi. Negizgi jabdyqtardyń tozýyna baılanysty basqa da kóptegen ınfraqurylymdyq aqaýlar oryn aldy. Munyń barlyǵy turǵyndardyń oryndy narazylyǵyna alyp keldi», - dedi Álıhan Smaıylov.