Úkimet otyrysynda Úkimet basshysy Álıhan Smaıylov Oqý-aǵartý mınıstrligi men Ǵylym jáne joǵary bilim mınıstrligine birqatar tapsyrma júktedi.
QR Premer-Mınıstri Álıhan Smaıylov aýyl balalaryn qosymsha bilimmen qamtýdy ulǵaıtýdy tapsyrdy, dep habarlaıdy Almaty-akshamy.kz QazAqparatqa silteme jasap.
«Oqý-aǵartý mınıstrligi múddeli memlekettik organdarmen birlesip, «Jaıly mektep» ulttyq jobasyn pysyqtaý boıynsha barlyq sharalardy qabyldaýy tıis. Ony «Bilimdi Últ» ulttyq jobasymen jedel úılestirý qajet. Jalpy, «Bilimdi Últ» ulttyq jobasynyń josparlanǵan barlyq kórsetkishterine qol jetkizýi kerek», - dedi Álıhan Smaıylov Úkimet otyrysynda.
Sonymen qatar Premer-Mınıstr mektepke deıingi uıymdar qyzmetiniń sapasyn arttyrý úshin Oqý-aǵartý mınıstrligine bıylǵy 1 qarashaǵa deıin mektepke deıingi uıymdardy lısenzıalaý máselelerin pysyqtaýdy tapsyrdy.
«Oqý-aǵartý mınıstrligi Mádenıet jáne sport mınıstrligimen, óńir ákimdikterimen birlesip, aýyldyq jerlerde balalardy qosymsha bilimmen qamtýdy ulǵaıtsyn», - dedi Úkimet basshysy.
Smaıylov ataǵandaı, óńir ákimdikteri jastardyń jumyspen qamtylýyn arttyrý maqsatynda memlekettik bilim berý tapsyrysy negizinde kolejderge qabyldaýdy ulǵaıtýdy qamtamasyz etýi kerek.
«Ǵylym jáne joǵary bilim mınıstrligine Qarjy, Ulttyq ekonomıka mınıstrlikterimen birlesip, elimizdiń óńirlik jetekshi memlekettik ýnıversıtetteriniń bazasynda Akademıalyq artyqshylyq ortalyqtaryn qurý máselelerin pysyqtaýdy tapsyramyn. Osy jumysty úılestirý jáne baqylaý Eraly Luqpanulyna júkteledi», - dedi ol.