2022 jyldyń qorytyndysy boıynsha Qazaqstan men Bashqurtstan arasyndaǵy taýar aınalymy $382 mln qurady
QR Premer-Mınıstri Álıhan Smaıylov Astanada Reseı Federasıasy Bashqurtstan Respýblıkasynyń Premer-Mınıstri Andreı Nazarov bastaǵan úkimettik delegasıamen kezdesý ótkizdi, dep habarlaıdy Almaty-akshamy.kz.
Kezdesý barysynda saýda, ónerkásiptik kooperasıa, aýyl sharýashylyǵy, logıstıka, týrızm jáne mádenıet salalaryndaǵy yntymaqtastyqtyń ózekti máseleleri talqylandy.
2022 jyldyń qorytyndysy boıynsha Qazaqstan men Bashqurtstan arasyndaǵy óńiraralyq taýar aınalymy belgili bir ósim kórsete otyryp shamamen $382 mln qurady.
Bul rette taýar aınalymyn odan ári arttyrýǵa jáne jetkiziletin taýarlar túrlerin keńeıtýge áleýet bar.
Úkimet basshysy ónerkásiptik kooperasıa salasyndaǵy birlesken jobalardyń sany artyp kele jatqanyn atap ótti.
Naqtyraq aıtqanda, Qostanaı oblysynda «Ýralskıı prýjınnyı zavod» JSHQ-nyń óndirisin lokalızasıalaý jumystary júrgizilip jatyr.
«Bashkırskaıa sodovaıa kompanıa» AQ-men jalpy somasy shamamen $716 mln bolatyn eki iri joba boıynsha yntymaqtastyq ornatylýda. «Qazaqstan Úkimeti bashqurttyq kásipkerlerge ınvestısıalyq jobalardy iske asyrýda qajetti qoldaý kórsetýge daıyn», - dedi Álıhan Smaıylov.
Óz tarapynan Andreı Nazarov Qazaqstan men Bashqurtstannyń aımaqtaryn túrli salalardaǵy kóp jyldyq tyǵyz yntymaqtastyq baılanystyratynyn atap ótti. Sonymen birge ony odan ári keńeıtýge jetkilikti áleýet bar.
«Biz qazaqstandyq baǵytta Bashqurtstan úshin jáne jalpy elimiz úshin, Qazaqstan úshin de úlken múmkindikter kórip otyrmyz. Sondyqtan biz qarym-qatynasymyzdy ári qaraı nyǵaıtyp, jańa baǵyttar men damý núktelerin qosqymyz keledi», - dedi Andreı Nazarov.