Úkimette áleýmettik mańyzy bar azyq-túlik taýarlary baǵasyn turaqtandyrý máseleleri aıtyldy.
Onyń barysynda Premer-Mınıstr atalǵan baǵyttaǵy jergilikti ákimderdiń jumysyna kóńili tolmaıtynyn aıtty, dep habarlaıdy Almaty-akshamy.kz.
Bıylǵy mindet – 2023 jyldyń qorytyndysy boıynsha ınflásıa deńgeıin 9,5 paıyzdan asyrmaý. Premerdiń aıtýynsha, buǵan qol jetkizýge ábden bolady. Tek bul úshin barlyq óńirlerdiń azyq-túlik baǵasyn turaqtandyrý, ásirese, maýsymaralyq kezeńde baǵany ustap turý úshin jergilikti atqarý organdarynyń belsendi jumysy qajet.
«Sizderde qajetti quraldardyń bári bar. Biz ótken jylǵy eginnen qajetti qor jınap aldyq. Sondyqtan belgilengen baǵa boıynsha kókónis ónimderinen tapshylyq bolmaýy tıis edi. Ákimderge baǵany ustaý úshin qajetti tetikterdiń barlyǵyn berdik. Qarjy da bólindi. Biraq baǵa báribir ósip kele jatyr. Ákimdikterdiń tıimdi jumysyn kórip otyrǵan joqpyz. Jergilikti jerlerde atalǵan máselelerge salǵyrt qaraýdyń kesirinen baǵanyń ósýi toqtaıtyn emes», - dedi Álıhan Smaıylov.
Sondaı-aq, Úkimet basshysy óńirlerge pıaz boıynsha kelisimshart jasaý tapsyrylǵanyn jáne ákimder ónim kólemi jetkilikti dep birneshe ret bizge baıandaǵanyn aıta kelip: «Endeshe pıaz baǵasy nege qymbattap bara jatyr?» degen zańdy saýal qoıdy. Elimizde pıaz kóp ósedi. Alaıda Úkimet baǵany tómendetý úshin pıaz eksportyna tyıym salyp, shuǵyl sharalar qabyldaýǵa májbúr.
«Taǵy da qaıtalap aıtamyn, azyq-túlik ónimderine baǵany turaqtandyrý – Úkimet pen jergilikti atqarýshy organdardyń asa mańyzdy negizgi mindeti. Jumysqa nemquraıly qaraý oryn alsa jáne nátıje bolmasa, tıisti sheshimder qabyldanady. Bul týraly buǵan deıin de aıtyldy», - dedi Á.Smaıylov.