2022 jyly ekonomıkanyń 3,9%-ǵa deıin ósýin qamtamasyz etý josparlanyp otyr.
QR Premer-Mınıstri Asqar Mamınniń tóraǵalyǵymen ótken Úkimet otyrysynda Ulttyq ekonomıka mınıstri Áset Erǵalıev, Ulttyq bank tóraǵasy Erbolat Dosaev, qarjy mınıstri Erulan Jamaýbaev baıandama jasady, dep habarlaıdy Almaty-akshamy.kz Rrimeminister.kz saıtyna silteme jasap.
Úkimet basshysy respýblıkalyq búdjettiń usynylyp otyrǵan jobasy, eń aldymen, memlekettiń barlyq áleýmettik mindettemelerin tolyq ári ýaqytyly oryndaýǵa, sondaı-aq qazirgi jaǵdaıda ekonomıkanyń sapaly jáne turaqty damýyn qamtamasyz etýge baǵyttalǵanyn atap ótti.
Daǵdarysqa qarsy makroekonomıkalyq saıasatty iske asyrý pandemıanyń saldaryn jumsartyp, ekonomıkalyq ósý qarqynyn qalpyna keltirý prosesin iske qosýǵa múmkindik berdi.
2022 jyly ekonomıkanyń 3,9%-ǵa deıin ósýin qamtamasyz etý josparlanyp otyr. Ataýly JİÓ 2022 jyly 87,1 trln teńgeden 2026 jyly 119,9 trln teńgege deıin ósedi. Jyldyq ınflásıanyń nysanaly dálizi 2022 jyly 4-6%-dy quraıdy, keıinnen 2026 jyly 3-4%-ǵa deıin tómendeıdi.
Shıkizattyq emes sektor sapaly ósýdiń negizgi draıverleriniń birine aınalady jáne ekonomıka turaqtylyǵynyń negizgi faktory bolyp qala beredi.
Búdjet shyǵystarynyń negizgi baǵyttary ekonomıkanyń naqty sektoryn, kásipkerlikti, áleýmettik ınfraqurylymdy, onyń ishinde densaýlyq saqtaý jáne bilim berý júıelerin, mádenıet pen sport salalaryn, sondaı-aq qaýipsizdik pen quqyqtyq tártipti sapaly jáne ornyqty damytýdy qamtamasyz etý bolmaq.
Úkimet basshysy atalǵan zań jobalary men áleýmettik-ekonomıkalyq damý boljamyn Parlamentke engizýdi qamtamasyz etýdi tapsyrdy.