Qazaqstan Respýblıkasynyń Bas prokýratýrasy Qazaqstannan tys jerlerge qashyp ketken zań buzýshylardy ekstradısıalaý boıynsha jumystardy jalǵastyrýda.
Aǵymdaǵy jyldyń 18 qarashasynda «OLIMP KZ» býkmekerlik keńseciniń qyzmetimen baılanysty qylmystyq toptyń quramynda bolǵan kúdikti Germanıadan Qazaqstanǵa ekstradısıalanǵan bolatyn.
Búgin Bas prokýratýra, Qarjylyq monıtorıń agenttigi jáne İİM-niń Interpol qyzmetkerleri Syrtqy ister mınıstrliginiń kómegimen onyń sybaılasyn Serbıa Respýblıkasynan ekstradısıalady, dep habarlaıdy Almaty-akshamy.kz.
Olar 2014-2019 jyldary qylmystyq toptyń quramynda zańsyz qumar oıyndaryn ótkizýge, salyqty jáne búdjetke tólenetin basqa da mindetti tólemderdi tóleýden jaltarǵany, sondaı-aq qylmystyq jolmen alynǵan aqsha men múlikti zańdastyrýǵa qatysy bar degen kúdikke ilingen.
Atalǵan zańsyz áreketterdiń saldarynan memleketke 86 mıllıard teńgeden astam shyǵyn keltirilgen.
Osyǵan baılanysty kúdiktilerge qatysty sotqa deıingi tergep-tekserý bastalyp, keıin olar halyqaralyq izdeýge jarıalanǵan.
Qylmystardy jasaǵany úshin múlkin tárkileýmen 3 jyldan 10 jylǵa deıingi merzimge bas bostandyǵynan aıyrý jazasy kózdelgen.
Qazirgi ýaqytta kúdikti Astana qalasynyń tergeý ızolátoryna qamaldy.
Aıta keteıik, fıgýrantty ekstradısıalaý Qazaqstan men Serbıa arasyndaǵy «Ustap berý týraly» sharttyń bolýyna baılanysty múmkin boldy.