14 qyrkúıek — Dúnıejúzilik atopıalyq dermatıt kúni
Atopıalyq dermatıt – álemdegi mıllıondaǵan adamǵa, ásirese balalarǵa áser etetin sozylmaly qabyný teri aýrýy. Alergıalyq sıpattaǵy bul syrqat ádette balalyq shaqta, kóbinese alǵashqy aılarda bastalyp, ómir boıy jalǵasýy múmkin.
Jyl saıyn 14 qyrkúıekte atopıalyq dermatıt týraly habardar etý jáne naýqastarǵa qoldaý kórsetý maqsatynda Dúnıejúzilik atopıalyq dermatıtpen kúres kúni atap ótiledi. Aýrýdyń negizgi belgileri – teriniń qatty qyshýy, qyzarýy, qabyrshaqtanýy jáne uıqynyń buzylýyna ákeletin qabynýlar. Bul sımptomdar naýqastardyń ómir sapasyna aıtarlyqtaı áser etip, tipti uıqysyzdyq pen depressıaǵa ákelýi múmkin.
Atopıalyq dermatıttiń naqty sebepteri áli tolyq anyqtalmaǵan, biraq genetıkalyq, ekologıalyq jáne ımmýnologıalyq faktorlar mańyzdy ról atqarady dep sanalady.
Kardıologıa jáne ishki aýrýlar ǵylymı-zertteý ınstıtýty Respýblıkalyq alergologıa ortalyǵynyń meńgerýshisi Araı Batyrbaevanyń aıtýynsha, qazirgi tańda atopıalyq dermatıtti emdeýdiń birneshe tásilderi bar. Olardyń qatarynda jergilikti kortıkosteroıdtar, kremder, antıgıstamınder jáne keıbir jaǵdaılarda júıelik preparattar qoldanylady. Aýrýdy erte dıagnostıkalaý men durys emdeý sımptomdardy jeńildetip, naýqastyń jaǵdaıyn aıtarlyqtaı jaqsartady.
Araı Batyrbaeva: «Dúnıejúzilik atopıalyq dermatıt kúni – bul syrqat týraly habardar bolý múmkindigi ǵana emes, sonymen qatar osy aýrýdan zardap shegetinder úshin qoldaý kórsetýge baǵyttalǵan mańyzdy kún», – dep atap ótti.