Adam ómirine arasha túsetin dárigerlik mamandyqty tańdaý - úlken jaýapkershilik. Sebebi, dáriger adam anatomıasyn óte tereń bilýmen qatar, kez kelgen jaǵdaıdaǵy naýqastan jıirkenbeıtin, qannan qoryqpaıtyn, adam taǵdyryna nemquraıly qaramaıtyn, tózimdi, júıkesi myqty jan bolýy kerek.
Sondaı jandardyń biri – Almaty qalasy Qylmystyq atqarý júıesi departamentine qarasty №11 mekemesindegi emdeý bóliminiń basshysy, ádilet maıory Dılnara Rashıdınqyzy.
№11 mekemesinde, ıaǵnı jasóspirimder kolonıasynda, qazirgi kúni kámeletke tolmaǵan 36 jasóspirim jazasyn ótep jatyr. Mekemede 6 oryndyq medısınalyq bólim jáne ókpe aýrýyna arnalǵan oqshaýlaý orny bar, 17 aq halatty abzal jan jumys isteıdi.
Medısınalyq bólim basshysy Dılnara Nýrdınovanyń aıtýynsha, medısına bóliminiń qyzmetkerleri mekemege kelip túsken sottalǵandarǵa turaqty medısınalyq kómek kórsetip, sonymen qatar jylyna eki ret josparly túrde profılaktıkalyq tekserýden ótkizip turady. Almaty qalasyndaǵy №24 qalalyq emhanamen tyǵyz baılanysta, profılaktıkalyq tekserý júrgizý kezinde sol mekemeden lor, hırýrg, nevropatolog, terapevt, okýlıs mamandar shaqyrtylady.
Mekemedegi sottalǵandar arasynda sozylmaly aýrý anyqtalǵan naýqastar medısına bóliminiń qyzmetkerlerimen únemi qadaǵalanyp, ýaqytyly dári-dármekter berilip, qajet bolǵan jaǵdaıda Almatynyń aýrýhanalarynan arnaıy maman-dárigerler shaqyrylyp, qosymsha tekserý jumystary júrgizilip, qorytyndy dıagnoz qoıylyp, qajetti em alynady. Mekemede arnaıy stomatologıa kabıneti bar, tisi aýyrǵan sottalǵandarǵa em kórsetý úshin medısınalyq qural-jabdyqtarmen tolyqtaı jabdyqtalǵan.
– Eńbek etpeı baqytty ómir súrý múmkin emes. Al janyń súıetin is ózgelerge paıdaly bolsa, odan asqan baqyt joq shyǵar. Batyldyq, jan jylýy, ózgelerge járdem berý – barlyq dárigerge tán qasıet. Dárigerler júreginde Gıppokrat antyna árdaıym adal bolady. Jas mamandarǵa da solaı bolýdy tileımin. Ol úshin kóp izdenip, kóp eńbektený kerek, – deıdi Dılnara Rashıdınqyzy.
Áıel adamǵa jumys pen otbasyn qatar alyp júrý áste ońaı emes. Onyń ústine bizdiń keıipkerimiz jabyq mekemede, ıaǵnı bas bostandyǵynan aıyrylǵan jastar otyrǵan kolonıada 26 jyldan beri eńbek etip keledi. Jaýapkershilik úlken. Biraq ol bárine úlgerýge tyrysady. Otbasynyń uıytqysy, eki uldyń aıaýly anasy.