Kaspi.kz İİM kóshi-qon qyzmeti komıtetimen, Ádilet mınıstrligimen jáne SDIAÓM-men birlesip, jańa qyzmetti iske qosty.
Endi mobıldi qosymshada turǵylyqty jeri boıynsha ýaqytsha nemese turaqty tirkeýdi rásimdeýge bolady, dep habarlaıdy Almaty-akshamy.kz.
Polisia.kz aqparaty boıynsha, bul qyzmet arqyly úı ıesi ózin jáne otbasy múshelerin (14 jastan asqan balalar), sondaı-aq birge turatyn basqa da adamdardy óz páterinde tirkeı alady. Sonymen qatar menshik ıesi óz úıinen birge turmaıtyn adamdardy óz betinshe tirkeýden shyǵara alady. Eger siz úıdiń ıesi bolmasańyz jáne bireýge tirkelgińiz kelse, onda servıstiń ózi úı ıesiniń kelisimin suraıdy.
«Biz Kaspi.kz-te jańa qyzmetterdi iske qosýdy jalǵastyryp jatyrmyz. Siz memlekettik mekemelerden anyqtama ala alasyz, balalarǵa arnalǵan járdemaqylardy rásimdeı alasyz, turǵylyqty jerińiz boıynsha tirkele alasyz jáne basqa da kóptegen máselelerdi tez sheshe alasyz. Biz İİM, Ádilet jáne Sıfrlandyrý mınıstrlikterine, sondaı-aq basqa da memlekettik organdarǵa memlekettik qyzmetterdi qazaqstandyqtar úshin odan da yńǵaıly jáne qoljetimdi etý múmkindigine alǵys aıtamyz», – dedi Kaspi.kz basshysy jáne quryltaıshysy Mıhaıl Lomtadze.
İİM Memleket basshysynyń tapsyrmasy boıynsha polısıa qyzmetin sıfrlandyrý jumysyn jalǵastyrýda.
«Mobıldi qosymshalar qarapaıym jáne túsinikti, al olardy paıdalaný kórsetiletin qyzmetti alýshy men qyzmetkerdiń tikeleı baılanysyn boldyrmaıdy. Sondyqtan İİM halyqqa kórsetiletin memlekettik qyzmetterdi smartfondarǵa shyǵarýǵa erekshe nazar aýdarady. Eń kóp suranysqa ıe memlekettik qyzmetter onlaın rejımde qoljetimdi. Endi azamattar HQKO men polısıaǵa baryp, kezekte turyp, ýaqyt joǵaltpaıdy», – dep atap ótti QR İİM kóshi-qon qyzmeti komıtetiniń tóraǵasy Aslan Atalyqov.
«Ekinshi deńgeıli bankterdiń mobıldi qosymshalarynda qyzmetterdiń tanymaldyǵy jyl saıyn artyp keledi. Mysaly, ótken jyly syrtqy platformalar arqyly mıllıonnan astam qyzmet kórsetildi», – dep habarlady SDIAÓM.
Tirkeý kezinde JSN engizý jetkilikti, al aty-jóni men mekenjaıy avtomatty túrde paıda bolady. Qyzmetti paıdalaný qaýipsiz. Tirkelý kezinde foto sáıkestendirýden ótý kerek. Bul sizden basqa eshkim sizdiń atyńyzdan atalmysh qyzmetti paıdalana almaıtyndyǵyna kepildik beredi.