Memlekettik qyzmetshiler burynǵy laýazymda teris qylyq jasaǵany úshin jazalanatyn bolady.
Prezıdent Qasym-Jomart Toqaev memlekettik qyzmetshilerge tártiptik jaza qoldaný qaǵıdalaryna ózgerister men tolyqtyrýlar engizý týraly Jarlyqqa qol qoıdy, - dep habarlaıdy aqshamnews.kz
Qujat normatıvtik quqyqtyq aktilerdiń resmı saıtynda jarıalandy. Ózgerister saıası jáne ákimshilik memlekettik qyzmetshilerge qatysty. Endi olar buryn atqarǵan laýazymdarynda jasaǵan tártip buzýshylyqtary úshin de jaýapkershilikke tartylýy múmkin, tipti qazirgi ýaqytta basqa qyzmette bolsa da.
Eger aldyńǵy memlekettik laýazym memlekettik saıası laýazym bolyp tabylsa, onda tártiptik jaýaptylyq máselesin qaraýdy memlekettik qyzmetshi tártiptik teris qylyq jasaǵan kezde laýazymdy atqarǵan memlekettik organ osy Qaǵıdalardyń memlekettik saıası qyzmetshilerge qatysty tıisti erejelerin qoldana otyryp júzege asyrady.
Qyzmettik tergeý: merzim jáne rásimder
Jańa ózgerister tártipbuzýshylyq derekteri boıynsha qyzmettik tergeý taǵaıyndaý tártibin retteıdi. Endi buryn qyzmet atqarǵan memlekettik organ úsh jumys kúni ishinde qazirgi jumys ornyn tekserýdiń bastalǵany jóninde habardar etýi tıis.
Materıaldardy qaraý burynǵy jumys orny boıynsha komısıada ótedi, al tártiptik jaza qoldaný týraly sheshim bes jumys kúni ishinde jańa jumys ornyna jiberiledi.
Jańa redaksıaǵa sáıkes, eger saıası nemese ákimshilik memlekettik qyzmetshiniń ókilettigi toqtaǵan sátte tártiptik jaza alynbaǵan bolsa, ol qyzmetten bosatylǵan kúnnen bastap avtomatty túrde alynǵan dep esepteledi.