Ulttyq biryńǵaı testileýden az bal jınaǵan almatylyq stýdent Nurdáýlet Baıhanov komandasymen birge «bolashaq túlekter qınalyp qalmasa eken» degen nıetpen UNAI (ıýnaı) mobıldi qosymshasyn jasap, iske qosty. Qosymsha mektep bitirýshilerge Ulttyq biryńǵaı testileýge tegin daıyndalýǵa, qatemen jumys jasaýǵa, taldaý júrgizip, toppen synaq tapsyrýǵa múmkindik beredi, dep habarlaıdy almaty-akshamy.kz.
Qazirgi ýaqytta ulttyq biryńǵaı testileýge daıyndaıtyn qosymshalar, onlaın platformalar kóp. UNAI-dyń ereksheligi – qosymshany qoldaný tegin. Sonymen qatar tek UBT-ǵa daıyndalyp ǵana qoımaı, túlekter óz bilim deńgeıin únemi baqylap otyra alady.
Nurdáýlet Baıhanov, stýdent: - Qaı ýaqyttan bastap UBT bar, sonyń bárin qamtydyq. Negizinen bizdiń baǵdarlamada 2022-2023 jańa baǵdarlamanyń suraqtary. Sebebi ózim UBT tapsyrǵan kezde tek qana jańa suraqtar kelgen bolatyn. Jáne de men sol suraqtardy taba almaı qınalǵandyqtan az bal jınaǵan bolatynmyn.
Bir jarym aı buryn iske qosylǵan mobıldi qosymshaǵa qazirdiń ózinde eki myńǵa jýyq qoldanýshy tirkelgen. Olardyń nátıjesi de jaman emes. Aldy 90 baldyq kórsetkishti eńserýde. Maqsatymyz - barynsha túlekterdiń joǵary bal jınap, qalaǵan mamandyqtary boıynsha joǵary oqý ornyna túsýine yqpal etý, deıdi Nurdáýlet. Mobıldi qosymsha qazaq jáne orys tilinde jumys isteıdi.
Nurdáýlet Baıhanov, stýdent: - Prılojenıe óte ońaı. Júktegennen keıin, oınaý batyrmasy turady. Sol arqyly basý arqyly, tolyqtaı ózińizdiń dosyńyzben, synyptasyńyzben nemese jalǵyz ózińiz tolyqtaı daıyndalsańyz bolady.
Bul komandalyq jumys. Nurdáýlet Baıhanovtyń jobadaǵy pozısıasy Co-founder, ıaǵnı joba avtory jáne ony damytýshy. Startap joba retinde bastalǵan qosymshany qoldanysqa engizýge bir jarym jyl ýaqyt ketipti.
Kúljan Toǵjanova, ýnıversıtettiń kafedra meńgerýshisi: - Nurdaýlet ózin ózi damytýǵa jáne bilimin jetildirýge daıyn. Ózi umtylyspen barlyq jumystardy atqaryp júredi. Stýdentterge barlyǵy qoljetimdi. Oqımyn dese, jumys isteımin dese, zaman talabyna saı qajetti baǵdarlamalardy ázirleımin dese barlyq múmkindik jasalynǵan stýdentterge.
Nurdáýlet Baıhanovtyń komandasy qazir sportpen aınalysýshalarǵa arnalǵan tıimdi qosymsha jasaýdy qolǵa alypty. Al UNAI mobıldi qosymshasyn AppStore men PlayMarket-ten júktep alýǵa bolady.