Úkimette ótken brıfıńte ǵylym jáne joǵary bilim mınıstri Saıasat Nurbek 2025 jyly ulttyq biryńǵaı test tapsyrýdyń jańa formaty pılot joba retinde iske qosylatynyn aıtty.
Mınıstr álemniń kóp elinde testileýdi alyp tastaý máselesi qyzý talqylanyp jatqanyn aıtty, dep habarlaıdy Almaty-akshamy.kz.
"Máselen AQSH pandemıa kezinde standartty testti alyp tastady jáne ýnıversıtetter óte kúrdeli máselege tap boldy. Ortalyqtandyrylmaǵan oqýǵa túsý júıesine qaramastan, kem degende stýdentterdi baǵalaý, salystyrý jáne irikteý úshin qandaı da bir standart qajet", – deıdi Saıasat Nurbek.
Onyń aıtýynsha, mınıstrlik 2021 jyldan bastap dúnıejúzilik banktiń qoldaýymen UBT formatyn qaıta qurý jáne eń bastysy – test suraqtarynyń mazmunyn túbegeıli qaıta óńdeý boıynsha úlken jobany iske qosqan.
"Aldyńǵy jyly biz eki baǵyt boıynsha jumys istedik. Birinshisi – jańa format boıynsha test daıyndaý. Barlyq suraqtardy mazmundy túrde qaıta qaraý kerek boldy. Ótken aptada bul komponent aıaqtaldy. Test daıyndaýdy álemge áıgili fransýz kompanıasy júrgizdi. Jańa model boıynsha 350 testolog daıyndaldy", – dedi mınıstr.
Ekinshi baǵyt – fınlándıalyq kompanıalar tobymen UBT qurylymy boıynsha jumys.
"Bul arnaıy oqytylǵan testologtar toby SIT formatyna uqsas jańa ádisteme boıynsha suraqtar daıyndaı bastaıdy. Bul – halyqaralyq deńgeıde tanylǵan test. Oǵan qosa, biz bazany qurǵanda jańa UBT formatyn pılot túrde bastaý úshin kem degende 50 myń suraq ázirleýimiz kerek. Munda da muqıat, uqypty bolýymyz kerek. Óıtkeni formattyń kúrt ózgerýi de úlken problemalarǵa alyp keledi, joǵary synyp oqýshylaryn osy formatqa daıyndaý qajet", – dep atap ótti Saıasat Nurbek.
Vedomstvo basshysy osy jyldan bastap mınıstrlik úlken pılot jobaǵa daıyndyq bastaıtynyn aıtty.
"Biz pılot jobany kelesi jyly bastaımyz. Joba UBT formatyn birden ózgertpeıdi, belgili bir pılottyq rejımde iske qosylady. Birte-birte biz SIT halyqaralyq standartyna kóshemiz, onda ár talapkerdiń ózi testileý ornyn, ýaqytyn tańdaıdy, daıyndalady, tapsyrady, sertıfıkat alady, sonymen oqýǵa túsedi", – dedi mınıstr.