Testileý 5 shildege deıin jalǵasady
Negizgi UBT-ny 40 myń talapker tapsyrdy. Talapkerlerdiń 70%-y qazaq tilinde, 30%-y orys tilinde, 50 adam aǵylshyn tilinde testileýden ótti, dep habarlaıdy Almaty-akshamy.kz Baq.kz-ke silteme jasap.
UBT bastalǵaly shekti baldy 76%-ǵa jýyq talapker jınady. Ortasha balǵa keletin bolsaq, ol 68 baldy qurady. Eń joǵary bal – 137.
«Negizgi UBT-nyń birinshi aptasy aıaqtaldy. Testileý 5 shildege deıin ótedi. Esterińizge sala ketsem, testileýge qatysýǵa eki múmkindikti esepke alǵanda 305 myńǵa jýyq ótinish kelip tústi. Qazirgi tańda testilenýshilerdiń basym bóligi, atap aıtqanda, 20%-y «Matematıka-Fızıka» pánder kombınasıasyn tapsyrdy. 14%-y «Bıologıa-Hımıa» kombınasıasyn tańdaǵan. Eń az tańdalatyn kombınasıa – «Hımıa-Fızıka», ony 50 adam tapsyrǵan», - dep atap ótti ǴJBM Ulttyq testileý ortalyǵynyń dırektory Rýslan Emelbaev.
Erekshe bilim berý qajettilikteri bar oqýǵa túsýshiler úshin qolaıly jaǵdaı jasaýdyń arqasynda UBT-ǵa birinshi aptada 108 talapker qatysqanyn aıta ketken jón.
Talapkerler testileý aıaqtalǵannan keıin 30 mınýt ishinde apelásıaǵa bere alady. Sertıfıkat apelásıa týraly sheshim qabyldanǵannan keıin testilenýshiniń jeke kabınetinde qoljetimdi bolady.
Búgingi tańda 50 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorıadan 39 adam shyǵarylyp, olardyń nátıjeleri joıyldy. Ózge tulǵalar anyqtalǵan joq.
Aıta ketsek, 2023 jylǵy UBT aıaqtalǵannan keıin kúntizbelik jyldyń 31 qazanyna deıin testileýdiń beınejazbalaryna taldaý júrgiziledi. Tyıym salynǵan zattardy paıdalaný nemese erejelerdi buzý faktileri anyqtalǵan jaǵdaıda túsýshiniń UBT nátıjeleri joıylady.