Qarýly Kúshterdiń ardageri, otstavkadaǵy general-maıor Ýálı Elamanov dúnıeden ótti, dep habarlaıdy Almaty-akshamy.kz Qorǵanys mınıstrligine silteme jasap.
27 mamyrda 71 jasqa qaraǵan shaǵynda Ýálı Bısaqanuly ómirden ozdy. Ol bar ǵumyryn áskerı iske arnap, ofıserlik mansaptyń, el azamatynyń abyroıly jolynan ótti. 1974 jyly Rázan joǵary desanttyq komandalyq ýchılıshesin bitirdi. Ofıserlik qyzmetti Qyrǵyzstannyń Osh qalasynda gvardıalyq áýe-desanttyq dıvızıasy parashút-desanttyq vzvodynyń komandıri bolyp bastady. Keıinnen Germanıadaǵy Keńes áskerleri tobynda (Kotbýs q., GDR) parashúttik-desanttyq batalónynyń komandıri laýazymynda qyzmet atqarǵan.
1985 jyly M.V. Frýnze atyndaǵy Áskerı akademıany bitirdi. 1992 jyly Qazaqstan táýelsizdik alǵannan keıin Qapshaǵaı qalasynda (qazirgi Qonaev q.) gvardıalyq desanttyq-shabýyldaý brıgadasy komandıriniń orynbasary jáne komandıri laýazymdaryn atqardy.
2001 jyly Reseı Federasıasy Qarýly Kúshteri Bas shtabynyń Áskerı akademıasyn úzdik bitirdi. Qazaqstan Qarýly Kúshteri Mobıldi kúshteriniń birinshi qolbasshysy.
2002 jyldan "Ońtústik" óńirlik qolbasshylyǵy áskerleriniń qolbasshysy.
2007 jyly shtab bastyqtary komıteti tóraǵasynyń orynbasary laýazymynda boldy. 2009 jyldan bastap Qazaqstan Respýblıkasy Qarýly Kúshteri Shtabtar bastyqtary komıteti tóraǵasynyń birinshi orynbasary boldy. Ol II dárejeli "Danq" ordenimen jáne kóptegen medaldarmen marapattalǵan.
"General-maıor Ýálı Bısaqanuly Elamanov saýatty da bilikti shákirtterdiń bir top býynyn tárbıeledi, abyroı bedelge ıe boldy, otbasynyń qamqorshysy bola bildi. 2011 jyldan bastap zeınetkerlikke shyqty. Qurmetti demalysta júrip te ol ǵumyryn Otanyna qyzmet etýge arnap, jumysyn jalǵastyrdy. Lev Gýmılev atyndaǵy Eýrazıa ulttyq ýnıversıtetiniń áskerı kafedrasyn basqardy. Qorǵanys mınıstrliginiń basshylyǵy men Qazaqstan Respýblıkasy Qarýly Kúshteriniń jeke quramy Ýálı Bısaqanulynyń mezgilsiz ómirden ótýine baılanysty marqumnyń týystary men jaqyndaryna qaıǵyryp kóńil aıtady. Ýálı Bısaqanuly jaıly jaqsy jáne jarqyn estelik bizdiń júregimizde máńgi saqtalady", - delingen habarlamada.