Aýyl sharýashylyǵy mınıstri Aıdarbek Saparov UBM Group kompanıasynyń dırektorlar keńesiniń tóraǵasy Akosh Vargamen kezdesti.
Kezdesýge Vengrıanyń Qazaqstan Respýblıkasyndaǵy Tótenshe jáne Ókiletti Elshisi Otto Ivan Rona, kompanıa ókilderi de qatysty, dep habarlaıdy aqshamnews.kz ASHM-ge silteme jasap.
Taraptar agroónerkásip salasyndaǵy ekijaqty yntymaqtastyqtyń ózekti máselelerin talqylady.
UBM Group Qazaqstannyń birqatar óńirlerinde qurama jem jáne premıks óndirý boıynsha jobalardy iske asyrýǵa nıetti. Buǵan deıin bul týraly negizdemelik kelisim memleket Basshysy Qasym-Jomart Toqaevtyń Vengrıaǵa sapary barysynda jasalǵan bolatyn.
2025-2028 jyldar aralyǵynda kompanıa Qostanaı, Aqmola jáne Túrkistan oblystarynda qurama jem óndiretin úsh zaýyttyń, sondaı-aq Almaty oblysynda premıks óndiretin zaýyttyń qurylysyna shamamen 83 mln AQSH dollaryn ınvestısıalaýdy josparlap otyr.
Aıdarbek Saparov mınıstrlik jobalardy iske asyrýǵa tolyq kómek kórsetetinin atap ótti.
Kezdesý sońynda qatysýshylar osy baǵyttaǵy birlesken kúsh-jiger elder arasyndaǵy saýda-ekonomıkalyq yntymaqtastyqty keńeıtýge jańa serpin beretinine senim bildirdi.