Úkimette «Taza Qazaqstan» ekologıalyq aksıasynyń iske asyrylý barysy qaraldy: 2024 jyly aksıaǵa 6,2 mln adam qatysty – 1,1 mln tonna qaldyq jınalyp, 1,6 mlnǵa jýyq aǵash otyrǵyzyldy, dep habarlaıdy aqshamnews.kz
QR Premer-mınıstri Oljas Bektenovtiń tóraǵalyǵymen ótken Úkimet otyrysynda «Taza Qazaqstan» ekologıalyq aksıasynyń iske asyrylý barysy týraly másele qaraldy.
Ekologıa jáne tabıǵı resýrstar mınıstri Erlan Nysanbaev 2024 jyly aksıaǵa qatysýshylardyń jalpy sany 6,2 mln adamdy quraǵanyn, 1,1 mln tonna qaldyq jınalyp, 1,6 mln aǵash otyrǵyzylǵanyn baıandady.
Premer-mınıstr «Taza Qazaqstan» aksıasynyń azamattardyń minez-qulyq mádenıetin qalyptastyrý, jalpyadamzattyq qundylyqtardy qoldaý jáne tabıǵatty qorǵaýdyń jańa ıdeologıasyn qalyptastyrý máselesindegi mańyzdylyǵyn atap ótti.
«Prezıdenttiń barlyq bastamalary, onyń ishinde ekologıa men qorshaǵan ortany jaqsartý, zańdylyq pen tártipti saqtaý qaǵıdaty ár adamnyń oı-sanasy men minez-qulyq mádenıetin qalyptastyrýǵa jáne sol arqyly jalpyadamzattyq qundylyqtardy qoldaýǵa baǵyttalyp otyr. Olar ýaqytsha naýqanǵa emes, tabıǵatty aıalaýǵa, aınalańa, tarıh pen dástúrge qurmetpen qaraýǵa úndeıtin qoǵamdyq jańa ıdeologıa retinde ornyǵýy tıis», — dep atap ótti Oljas Bektenov.
«Taza Qazaqstan» aksıasy ekologıalyq ahýaldy jaqsartý baǵytynda keshendi is-sharalar kózdelgen 2029 jylǵa deıingi uzaqmerzimdi tujyrymdama mártebesine ıe bolǵany aıtyldy.