«Taza like», «Ayala» jáne 2025 jyly ekologıalyq mádenıetti ilgeriletýge arnalǵan basqa da jobalar
2025 jyly elimizde qorshaǵan ortanyń jaı-kúıin jaqsartýǵa jáne qoǵamdy ekologıalyq bastamalarǵa tartýǵa baǵyttalǵan jańa ekologıalyq mádenıetti qalyptastyrý boıynsha belsendi jumys jalǵasatyn bolady. Bul týraly Úkimet otyrysynda mádenıet jáne aqparat mınıstri Aıda Balaeva baıandady, dep habarlaıdy aqshamnews.kz
Birinshi baǵyt – aýqymdy oqıǵalardy uıymdastyrý arqyly jańa ekologıalyq mádenıetti qalyptastyrý. «Taza like» jobasy tájirıbe almasýǵa jáne ekologıalyq problemalardyń sheshimin tabýǵa arnalǵan platforma bolady. Bul is-shara qoǵamdyq uıymdardy, ǵalymdar men beı-jaı qaramaıtyn adamdardy biriktiredi. Joba Naýryz Ulttyq merekesinen keıin bastalyp, elimizdiń barlyq óńirlerin qamtyp, 25 sáýirge deıin jalǵasady. Jobanyń sharyqtaý shegi Astanada ótetin iri Ekofestıvalmen qorytyndylanady. Ekologıa máselelerine nazar aýdarý úshin oqýshylar men jastar arasynda kreatıvti ıdeıalar jınaýǵa baǵyttalǵan «Ayala» art-festıvalin ótkizý josparlanýda.
Ekinshi baǵyt – ekologıalyq bilim. Dástúrli aqparattyq-aǵartý jumystarynan basqa, zamanaýı tehnologıalyq sheshimder belsendi paıdalanylatyn bolady. Atap aıtqanda, E-gov jáne banktik qosymshalardaǵy ekologıalyq oqıǵalar týraly halyqty keńinen aqparattandyrýǵa arnalǵan jańa «Eko is-shara» qosymshasy. Qoqys pen plasıkalyq buıymdardy bólek jınaý jumystary jalǵasady. Sondaı-aq jastar resýrstyq ortalyqtary bazasynda «Eko habtar» jobasyn keńeıtý usynylady. «Jasyl mektep» jobasy 500 myń oqýshyny jáne 3 mln-nan astam ata-ana men olardyń týystaryn tartýǵa múmkindik beredi.
Ekologıaǵa kıno túsirý salasynda da kóńil bólinetin bolady. Ormanshylar týraly «38» kınojobasy, sondaı-aq qoqys óńdeý zaýytyn ashyp, túrli ekologıalyq aksıalar ótkizetin ekoaktıvıst týraly «Aqjaýyn» serıasy bastalady. Budan basqa, «Saıahat Time» ulttyq telejobasy iske qosylady, onyń maqsaty – Qazaqstannyń tabıǵaty men ekologıalyq taza jerlerine uqypty qaraýdy nasıhattaý jáne kishkentaı kórermender úshin ekologıalyq tárbıeni damytatyn 3 anımasıalyq joba ázirlenedi.
Úshinshi baǵyt – ekologıaǵa tek el ishinde ǵana emes, odan tys jerlerde de jaýapkershilikpen qaraýdy qalyptastyrý. Qazaqstannyń, Ázerbaıjannyń jáne basqa da elderdiń qatysýymen Kaspıı teńiziniń jaǵalaýynda plogıng jobasy (júgirý arqyly qoqys jınaýdy da uıymdastyratyn ekologıalyq qozǵalys) iske asyrylatyn bolady. Qoǵamdyq ekologıalyq baqylaý jónindegi respýblıkalyq aksıalar jáne qoǵamdyq keńesterdiń, azamattyq qoǵamnyń, bıznestiń, oqý oryndarynyń, BAQ pen eriktilerdiń qatysýymen eko-patrýlder qurý jalǵasady.