52 qyzmet kórsetýshi uıymǵa qatysty 142 KPTÚ boıynsha shara qabyldandy
Elordada qardy ýaqytyly kúremegeni jáne shyǵarmaǵany úshin qyzmet kórsetetin 52 uıymǵa qatysty 142 kóppáterli turǵyn úı boıynsha buzýshylyqtardy joıý jóninde uıǵarym berildi. Jalpy sany 360 PIK pen MIB basshysy tıisti eskertý aldy, – dep habarlaıdy Almaty-akshamy.kz Elorda.info-ǵa silteme jasap.
Elorda aýmaǵyn abattandyrý erejelerine sáıkes, kondomınıým obektisin basqarý organdary – PIK, MIB sanıtarlyq tazartýdy, onyń ishinde úıdiń perımetri boıynsha bes metr shekaradaǵy irgeles aýmaqtyń qaryn kúreýdi qamtamasyz etýi mindetti.
Elordada aýdan ákimderiniń apparaty qalanyń jergilikti polısıa qyzmetiniń tabıǵat qorǵaý polısıasy ókilderimen birlesip qardan tazalaý boıynsha monıtorıń júrgizýde. Júrgizilgen jumystardyń nátıjeleri boıynsha 52 qyzmet kórsetýshi uıymǵa qatysty 142 KPTÚ boıynsha sharalar qabyldandy – buzýshylyqtardy joıý jóninde nusqamalar berildi. Sondaı-aq, kóppáterli turǵyn úılerge qyzmet kórsetetin 360 uıymnyń basshysy tıisti eskertý aldy.
Qyzmet kórsetetin uıymdarǵa qatysty berilgen nusqamalar oryndalmaǵan jaǵdaıda «Ákimshilik quqyq buzýshylyq týraly» Qazaqstan Respýblıkasy Kodeksiniń 505-babyna sáıkes ákimshilik jazalaý sharalary qabyldanatyn bolady. Qardy ýaqytyly jınamaǵany úshin PIK pen MIB basshylaryna 87 510 teńgeden 291 700 teńgege deıin aıyppul salynady. Osyǵan uqsas buzýshylyqqa jol berilgen jaǵdaıda, aıyppul mólsheri 116 680 teńgeden 875 100 teńgege deıin ósýi múmkin.
Elorda turǵyndary men qonaqtary úshin qaýipsiz jáne jaıly ortany qamtamasyz etý maqsatynda qardy ýaqytyly arshý máselesi qala ákimdiginiń erekshe baqylaýynda.
Aıta ketý kerek, elordanyń komýnaldyq qyzmetteri qysqy kezeńniń basynan bastap kúsheıtilgen rejımde, táýlik boıy jumys isteıdi.