Apamnyń kúıeýi Seıdan jezdemdi bári «Nachalnık» dep ketken. Ózi qara, qýań óńdi bolatyn. Kishiler Seıdan ata deıtinbiz. Shylymdy kóp shegetin. Basyna únemi bórik kıip júretin. Myltyq atqanda dáldikpen tıgizetin. Qaljyńdy tistep-tartyp aıtatyn. Aıtqanda ón boıyńdy shymyrlatatyn. Ar jaǵyn baǵamdaı berińiz. İsi nyq, áreketi eseppen bolatyn. Artyq qımylǵa bara bermeıtin. Bir kórgenge qý adam sıaqty seziletin.
Ol tuzaq, qaqpan qurýdyń sheberi edi. Bir kúni erte turdym. Kózimdi asha sala, apam men jezdem úıine jóneldim. Sondaǵy eki úıdiń qashyqtyǵy 20-30 mertdeı. Barsam, torda qasqyrdyń qos bóltirigi jatyr. Tústeri sur, ıtke uqsaıdy. Yryldaıdy. Jolatpaıdy. Kóp uzamaı terilerin sypyrdy. Janyń ashıdy. Tiri kezderinde yryldap, aıbat shekse de, kóz janarlarynan namys pen qaırat sezildi. Aıyby qaqpanǵa túskendigi. Kóp uzamaı toǵaıdaǵy qulyndy bıege qasqyr shapty. Sany belgisiz. Qulynnyń quıryǵyn osyp túsipti. Birazǵa deıin keshqurym mal qora jaqtan qasqyrdyń ulyǵan úni estilip júrdi. Osy ún aı jaryqta jańǵyryp beredi deısiz...
Ertesine jezdemder arlannyń izi jatqanyn aıtty. Álgi qulyn aram qatty. Bıeni baýyzdap úlgerdi. Al kókjaldar bolsa, birese qoradaǵy, birese túzdegi maldarǵa shabýyldaryn saıabyrlatpady. Jezdem de uzaq jyldar súıikti isinen bas tartpady. Sóıtip, qartaıyp, bir úıde jalǵyz qalyp, ómirden ótti. Tuzaqshynyń taǵdyry osylaı boldy.
Osy kúni "Sol eki bóltirikke beker tıdi me?" dep oılaımyn. Eki bóltiriktiń ómir súrýge degen qýatty janary kóz aldymda máńgi saqtalyp qaldy. Sol shabýyldaǵan qasqyrlardyń kúshikteri eken. Ony keıin bildik. Kim bilsin?! Bálkim, bóltirikterdi qoıa bergende, bári basqasha bolar ma edi?..