Qazaq - rýhty halyq. Batyrlar men danalardyń urpaǵy. Jaýgershilik kezeńde naızanyń ushymen, bilektiń kúshimen eldi qorǵady. Bahadúrlik qasıet qanmen sińedi. Bul – anyqtalǵan aksıoma.
Búgingi zaman - básekestiktiń qyzǵan shaǵy. Ol barlyq salada etek alǵan. Al sportta jetistikterimiz az emes. Onyń ishinde erejesiz jekpe-jekten kók baıraǵymyzdy barshaǵa tanytyp, ulttyq qundylyqtarymyzdy nasıhattap júrgen rýhty, júrekti, bilekti, ımandy jigitterimiz jeterlik. Búgingi keıipkerimiz - talaı dodalarda top jaryp júrgen oǵlan Shavkat Rahmonov.
Ǵumyr joly
Ashyq derekkózderge súıensek, batyrymyz 1994 jyly 23 aqpanda, Ózbekstannyń Sýhandarıa óńiri, Shyrshyda qazaq otbasynda dúnıege kelgen. Qujat bergen kezde tegi qate jazylyp ketken. Negizi – «Rahman». Aýlada oǵan únemi tóbelesýge týra kelgen. Áıtpese, ózinen kúshti balalardan soqqy jeıtinin túsingen. 12 jasynan bastap erejesiz jekpe-jek saıystaryna qyzyqqan.
2010 jyly otbasy atamekenge oralady. Ol Qaraǵandy bazarlarynda arbamen júk tasyp, aýyr eńbekti bastan keshirdi. Sóıte júrip, sport zalyna barýdy úzbesten sambo men boks jattyǵýlaryna qatysqan. Keıde kúnine sport zalyna eki mezgil barýǵa týra kelse de, ýaqyt taýyp, jattyǵýdan qalmaǵan. 16 jasynda kásibı sport jolyna túsedi.
Sporttyq mansabynyń bastaýy
Ár sportshynyń shamyn jaǵatyn áýeli ynta-jigeri, sodan keıin bilikti bapkeri ekeni anyq. Otbasy 2013 jyly Kókshetaýǵa qonys aýdarǵan soń, jattyqtyrýshy Baıan Janǵalovpen tanysyp, onyń quramasyna kiredi. Sonymen birge sport salasynda joǵary bilimdi qatar alady. Jattyǵady, oqıdy, maqsatyna jetýdi kózdeıdi. Birtindep qajyr-qaırattyń nátıjesi baıqala bastaıdy.
Baýyrymyz 19 jasynda aralas jekpe-jekten áýesqoılar arasyndaǵy alǵashqy jeńisine Sankt-Peterbýrgte qol jetkizedi. Bul saıysta qaırat pen shapshańdyqty qatar kórsetip, qarsylasy Ahmeddın Mırzadavladovty sulatyp salady.
Alǵashqy ret 2014 jyly qazan aıynda ol M-1 Global promoýsheninde debút jasady. Onda Adam Sýrovty aýyr ustaý (úshburyshty tunshyqtyrǵysh) arqyly merziminen buryn jeńdi.
Ol UFC-degi debútin 2020 jyldyń 24 qazanynda UFC 254 oqıǵasynda ótkizdi. Habıb - Getjı Aleks «Kovboı» Olıveıraǵa qarsy kezdesýde ǵajaıyp tásilderdi qoldanyp, 2-raýndta 2:10 esebimen baǵyný (gılotına drossel) arqyly jeńdi.
Shavkat UFC-degi úshinshi jeńisine jetip, taǵy bir satyǵa kóterildi. Naqtyraq aıtsaq, UFC Vegas 47 týrnırinde jartylaı orta salmaqta baq synaıtyn otandasymyz gaıandyq Karlston Harrısti birinshi raýndta utty. Qazaqtyń batyr uly MMA-da ótkizgen 15 jekpe-jektiń barlyǵynda merziminen buryn jeńiske jetken. Osylaısha, 34 jastaǵy Harrıs 17 jeńisimen mansabyndaǵy besinshi jeńiliske ushyrap, jerlesimizden aılasyn asyra almady.
Qazaqy namys
Álginde babalarymyzdyń namysty, rýhty bolǵandyǵyn tilge tıek ettik. Ol jaǵy shyndyq. Qazirgi tańdaǵy jastarymyzdyń boıynda namys qaınap, ulttyq rýhtyń oty alaýlap keledi. Oǵan kún ótken saıyn kýá bolýdamyz.
Shavkat - halqymyzdyń naǵyz batyry, ásteri jastarǵa úlgi. Kavkazdyq Habıb Nýrmaganbetov papahasyn ár jarysta nasıhattap, kıip shyǵady. Sondaı ulttyq qundylyqtyń álem aldynda nasıhattalýyn biz de kútip júrgen edik. Rýhty hám júrekti sportshy Shavkat Rahmanov qazaqtyń ulttyq bas kıimi - tymaqty kıip shyǵyp, bárin tánti etti. Sportsúıer qaýym ulttyq jádigerlerimizge nazar aýdara bastady. Ol alǵash bolyp ózimizdiń dástúrli qundylyǵymyzdy jalǵaǵan azamat.
Taǵy bir mysal keltireıin. Kezekti jeńisterinen keıin ózin synaýshylar men mineýshilerge qaıyrylyp, áleýmettik jeli qoldanýshylaryna óziniń «Naǵyz qazaq» ekenin aıtty. Jeńisterimen dáleldep keledi. Ultymyzda osyndaı qazaqy namysty jigitterdiń kóp bolǵanyna qýanamyz. Myń shúkir!
Túıin. Almaǵaıyp zamanda jas órenderge rýh pen qaırat beretin jas ta bolsa tulǵa kerek. Muny ýaqyttyń talaby der edik. Bizdiń halyq batyrǵa kende emes-ti. Sport jankúıerlerine tanymal Arman Ospanov, Jalǵas Jumaǵulovtar talaı bıikterdi baǵyndyryp júr.
Alǵashqylardyń biri bolyp UFC-men kelisim shart jasaǵan Shavkattyń jóni bir bólek. Batyrdyń sporttaǵy jetistikteri jas órenderge ónege-úlgi ekeni aqıqat. Qarakózderimiz batyr, otansúıgish, adal azamat bop qalyptassyn demekpiz.