Qazaqstan boıynsha 285 eldi mekendi sý basý qaýpi bar. QR Tótenshe jaǵdaılar mınıstri Iýrıı Ilın Úkimet otyrysynda osyndaı málimet berdi, dep habarlaıdy Almaty-akshamy.kz QazAqparatqa silteme jasap.
Áýeli ol 2017-2020 jyldarǵa arnalǵan sý tasqyny qaýpiniń aldyn alý jáne joıý jónindegi jol kartasy sheńberinde 41,9 mlrd teńgege 402 is-shara iske asyrylǵanyn eske saldy. Al 2022 jylǵy sý tasqyny kezeńine daıyndyq boıynsha sý tasqyny qaýpi bar eldi mekenderdi qorǵaýdy kózdeıtin 148 is-shara qolǵa alynǵan. Aıtýynsha, sonyń arqasynda 158 eldi mekendi tasqynnan qorǵaý artpaq.
«Jalpy, sý tasqynyna qarsy is-sharalar keshenin iske asyrý 340 eldi mekennen sý basý qaýpin alyp tastady jáne 385 eldi mekende qaýip barynsha azaıtyldy. Búgingi kúni sý tasqyny qaýpi bar 1010 eldi mekenniń 285-i úshin qaýip saqtalýda», - dedi Iýrıı Ilın.
Onyń málimeti boıynsha, eldiń taýly aımaqtarynda muzdyqtardyń qarqyndy erýi de tasqyn qaýpin joǵarylatyp otyr.
«Biz kanaldardy tazalaý, jarylý qaýpi bar 17 muzdaq kólde sıfondar ornatý sıaqty aldyn alý is-sharalaryn júrgizdik», - dedi mınıstr.