Buıryqtyń mátinine saı, áleýmettik qorǵalatyn azamattarǵa telekomýnıkasıa qyzmetterin kórsetkeni úshin tarıfterdiń kóterilýine baılanysty aı saıynǵy ótemaqy mólsheri qoldanystaǵy tarıftik jospar boıynsha baılanys qyzmetterine aı saıynǵy naqty shyǵys pen qazirgi shyǵys arasyndaǵy aıyrma retinde aıqyndalady.
Qujatta áleýmettik qorǵalatyn azamattarǵa telekomýnıkasıa qyzmetterin kórsetý tarıfteriniń kóterilýine baılanysty ótemaqy turǵyn úıdi ustaýǵa jáne komýnaldyq qyzmetterdi tutynýǵa aqy tóleý úshin turǵyn úı kómeginiń bóligi bolatyn aqshalaı ótemaqy túrinde beriledi degen.
Ótemaqy alýǵa kim quqyly?
Ótemaqy Qazaqstan Respýblıkasynyń aýmaǵyndaǵy jalǵyz turǵyn úı retinde menshik quqyǵyndaǵy turǵyn úıde turaqty tirkelgen jáne turatyn áleýmettik qorǵalatyn azamattarǵa, sonymen qatar memlekettik turǵyn úı qorynan turǵyn úıdi jaldaýshylarǵa (qosymsha jaldaýshylarǵa) tólenedi.
Qandaı qujattar qajet?
- Ótemaqy alý úshin abonent turǵylyqty jeri boıynsha ýákiletti organǵa turǵyn úı kómegin taǵaıyndaý úshin qajet qujattarmen júginýi qajet. Qujattardyń tizbesi turǵyn úı kómegin kórsetý erejelerimen aıqyndalady jáne mynalardy qamtıdy:
- ótinish berýshiniń jeke basyn kýálandyratyn qujattar (túpnusqasy sáıkestendirý maqsatynda usynylady);
- az qamtylǵan otbasynyń tabysyn rastaıtyn qujat;
- zeınetaqy jarnalary týraly anyqtama (tıisti memlekettik aqparattyq júıelerden alynǵan aqparatty qospaǵanda);
- jumys ornynan anyqtama nemese jumyssyz retinde tirkelgeni týraly anyqtama;
- balalarǵa jáne basqa da asyrap otyrǵan adamdarǵa alıment tóleý týraly málimetter;
- bank shoty;
- kondomınıým obektisin basqarýǵa jáne kondomınıým obektisiniń ortaq múlkin kútip-ustaýǵa, onyń ishinde kondomınıým obektisiniń ortaq múlkine kúrdeli jóndeý júrgizýge aı saıynǵy jarnalar boıynsha shot-faktýralar;
- komýnaldyq tólemder;
- telekomýnıkasıa qyzmetteri úshin túbirtek-shottar nemese baılanys qyzmetterin kórsetýge arnalǵan sharttyń kóshirmeleri;
- memlekettik turǵyn úı qorynan turǵyn úıdi jáne jeke turǵyn úı qorynan jergilikti atqarýshy organ jaldaǵan turǵyn úıdi paıdalanýǵa arnalǵan shyǵystyń shottary.
Ótemaqy tóleýge qarajatty qandaı tártippen aýdarady?
Ýákiletti organ ár aıdyń 5-ine deıin ótken aı úshin áleýmettik qorǵalatyn azamattarǵa telekomýnıkasıa qyzmetterin kórsetýge tarıfterdiń ósýine ótemaqy tóleýge qarajat qajet ekenin resimdeıdi jáne ony memlekettik josparlaý jónindegi ýákiletti organǵa joldaıdy.
Áleýmettik qorǵalatyn azamattarǵa telekomýnıkasıa qyzmetterin kórsetý tarıfteriniń ósimin óteýge qarajatty aýmaqtyq qazynashylyq organdaryna aýdarý kezinde ýákiletti organ tólemderdiń merzimi men somasyn kórsete otyryp, abonentterdiń tizimi qosa berilgen tólemge shot-faktýrany usynady.
Óz kezeginde ýákiletti organ toqsan saıyn esepti toqsannan keıingi aıdyń 5-ine búdjetti atqarý jónindegi ýákiletti organǵa áleýmettik qorǵalatyn adamdarǵa telekomýnıkasıa qyzmetterin kórsetýge tarıfterdiń kóterilýin óteýge tólengen somalar týraly aqparatty usynady.
Buıryq 2023 jyldyń 13 tamyzynan bastap qoldanysqa enedi.