Otbasyndaǵy janjaldan bastalyp zorlyq-zombylyqqa ulasatyn áreketterden zábir kóretinder– áıelder men balalar. Qylmystyq statısıka boıynsha sońǵy úsh jylda turmystyq álimjettik kórgen áıelderdiń kórsetkishi 25 paıyzdan asqan.
İshki ister mınıstrligi sońǵy on jylda otbasyndaǵy zorlyq-zombylyqqa qatysty qylmystyq istiń kúrt kóbeıgenin málimdeıdi. Ásirese, tótenshe jaǵdaı kezinde turmystyq janjal kórsetkishi 41,7 paıyzǵa ósken. Otbasy ishindegi zorlyq-zombylyqtan áıelderden bólek, balalarǵa da kúsh kórsetý tyıylmaı tur. Bul týraly IýNISEF pen Qazaqstan arasyndaǵy birikken zertteýlerde eresekterdiń 75 paıyzy balalardy tárbıeleý maqsatynda taıaqtaıtyny jazylǵan.
BUU málimetine súıensek, Ortalyq Azıadaǵy árbir úshinshi áıel men qyz ómiriniń bir kezeńinde zorlyq-zombylyqqa ushyraıdy eken. Al elimizde zorlyq-zombylyq ár segizinshi otbasynda oryn alatyn kórinedi. Ár jetinshi otbasyda áıel ekonomıkalyq zorlyqqa tap bolyp, ár altynshy áıel soqqyǵa jyǵylady, ár úshinshi áıel psıhologıalyq qysymǵa ushyraıdy. Turmystyq zorlyq-zombylyqtan Qazaqstanda jylyna 80 áıel kóz jumady.
Jaı estigende dene túrshiktiretin «zorlyq-zombylyq» sóziniń turmystyq jaǵdaıda oryn alýy odan ári úreılendiredi. Jaı kózge elestetkenniń ózinde seskenip qalatyn nárseniń, qanshama áıelder basynan ótip jatqandyǵy janyńa batady. Al, ondaı oqıǵalardy kózimen kórip, júregimen sezinip ósken balanyń mentaldy jaǵdaıynyń durys bolýy, árıne ekitalaı. Óz otbasynyń qorǵany bolýdy-qorqytýmen shatastyrǵan er symaqtardy dertti demeı, ne deımiz? Bir otbasy ǵana emes, búkil halyq, qoǵam dertine aınalǵan máseleniń túıitkili sheshiler emes. Sebebi, tek «er» sózin jamylyp júrgen adamdardyń óz ashýyn basa alýynda nemese psıhologıalyq jaǵdaıynyń nasharlaýynda ǵana emes. Óz jarynan qysym kóre tura ózin qorǵaýǵa áreket etpegen áıelderdiń de qateligi. Olar otbasyn saqtap qalý degen sebepten ǵana-aq ózine degen qurmetsizdikti keshirýge daıyn. Alaıda, bas amandyǵynan, janynan artyq nárse joq ekenin árbiri túsiný qajet. Al, er adam otbasyna zalal keltirý úshin emes, kerisinshe syrtqy qaterden saqtap, qamqorlyq pen jaýapkershilik tanytýy mindet ekenin eske salýymyz kerek. Sondyqtan da ár adam óz mindetin oryndap, mundaı bassyzdyqqa beı-jaı qaramasa, 1 áıel azamatynyń bolsa da ómiri saqtalatynyna kámil senemin...