Ǵasyrǵa jýyq merzimdi keri shegersek, qazaq kınosynyń kıno álemine áýpirimdep qadam basqan kezeńine taban tireımiz. Álbette, kıno álemine nyq-nyq qadamdar jasap, sol álemde tańba qaldyrý osy salanyń ushynan ustaǵandar úshin óte qıyn boldy. Ónerdiń altyn sandyǵy ispettes qazaqtyń kıno óneri óz jeńisin Qazan tóńkerisinen keıin bastady. Alǵash ret 1938 jyly "Lenfılm" kınostýdıasynda túsirilgen "Amangeldi" fılmi kógildir ekranǵa jol tartty. Sondaı-aq fılm eń alǵashqy belgili tulǵaǵa arnap túsirilgen týyndy edi. Bul fılmnen keıin de qazaq kıno qorjyny enshisin kórermen kózaıymyna aınalǵan talaı kınotýyndylarmen maılady.
Búgingi jańa ártister, jańa kınolar, jańa rejıserler ótken kúnniń elesine aınalǵan ǵasyr burynǵy týyndylardyń izin sýytpaı, qyl kópirin jalǵap keledi. Árıne, bul qazaq kınosynyń belgili dárejege ıe ekeniniń aıǵaǵy. Alǵashqy fılmder 1925-1946 jyldar aralyǵynda túsirildi. Keıin "Qazaqfılm" kınostýdıasynyń túsirýimen 1972 jyly Sultan Qojyqovtyń tolyqmetrajdy "Qyz Jibek" kórkem fılmi óz kórermenimen qaýyshty. Mine, osylaısha, otandyq fılmder bir arnada toǵysty. Bul jyldardy taǵy keri shegersek, 1991 jyldan beri qaraı jaryqqa shyqqan týyndylardyń dóp ústinen túsemiz. Dál osy ýaqyttan berige deıin qazaq kınosy jańa órkendeý baspaldaǵyna kóterilgendeı.
Táýelsizdik alǵannan keıin Qazaqstandaǵy kınostýdıalardyń sany da edáýir ósti. Memleket endi ǵana aıaǵynan turyp jatqanda, ónerdiń bul salasy birde shetkeri, birde ilgeri júrip jatty. Týyndylardyń jaryqqa shyǵýyna eń úlken kedergi kınostýdıalardyń shyǵynǵa ushyraýy edi. Jekemenshik kınostýdıalar ózderin qarajatpen qamtamasyz ete almaǵan soń, memleket te aıanyp qalmady. Sonyń arqasynda tek avtorlyq fılmderdi usynyp júrgen kınostýdıalar, túrli janrdaǵy fılmderdi de túsirýge qol jetkizdi. Osydan keıin memleket pen kınostýdıalar arnaıy kelisimshart jasasyp, kıno óndirisiniń damýyna aıtarlyqtaı qoldaý kórsetti.