Ár ulttyń tek ózine tán ulttyq boıaýyn kórsetip, ózgeden erekshelep turatyn – ulttyq ónerimen qatar, onyń salt-dástúrleri men ádet-ǵuryptary. Myńdaǵan jyldar ata-babadan jalǵasyn taýyp, boıymyzǵa ábden sińip, kúndelikti ómirimizdiń ajyramas bóligine aınalǵan salt-dástúrler men jón-joralǵylardyń bir uldyń ǵana emes, búkil ulttyń tárbıesinde alar orny bólek. Sondyqtan da qazaqta balanyń boıǵa bitken kúnin bilgennen bastap, ol ómir esigin ashyp, ósip-ónip, japyraǵyn keńge jaıyp, qarttyq jasqa jetkenine deıin jalǵasatyn joralǵylar men ádet-ǵuryptardyń árqaısysynyń ózindik mán-maǵynasy men atqarar róli erekshe.
Tekti urpaq tárbıelep, oń-solyn tanytyp, ádep pen ıba, syı men qurmet, jaýapkershilik pen paryz, úlkenniń joly men kishilik izetti, týystyq qarym-qatynasty, bereke-birlik pen baýyrmaldyqty, aınalasyna – adamdarǵa ǵana emes, tabıǵat, qorshaǵan ortaǵa degen qamqorlyqty balasynyń boıyna jastaıynan sińirip ósiretin atam qazaq qashan da «Alty jyl ash bolsań da, atańnyń saltyn umytpa» dep, dástúrine berik bolǵan. Ádet-ǵuryp pen jón-joralǵylar, nanym-senimge erekshe kózqaraspen qarap, olardy tárbıe quraly, ómir súrý zańdylyqtary retinde negizge alǵan.
Ata-babadan mura bolyp, urpaqtan-urpaqqa jetken osynaý salt-dástúrlerimiz, ádet-ǵuryp, nanym-senimdi jańǵyrtyp, jastarǵa tanytý maqsatynda aldaǵy ýaqytta gazet betinde turaqty túrde «Ata salty» aıdarymen jarıalap otyrýdy jón kórdik.
Erte kezeńnen aq ata-babalarymyz bala, urpaq tárbıesine kóp kóńil bólip, olardy úlkenge taǵzym, kishige iltıpat etip, baýyrmaldyqqa, meıirimdilikke, izettilikke baýlyǵan. «Tárbıe – tal besikten bastalady», «Uıada ne kórseń, ushqanda sony ilesiń» degen ulaǵatty sózdi jadyna ábden toqyǵan. Sondyqtan da balanyń baýyrmal, qaıyrymdy azamat bop erjetýi, aldymen, ata-ananyń tárbıesine, qorshaǵan ortanyń úlgi-ónegesine baılanysty. Balanyń alǵan tárbıesine qaraı «tárbıeli, ónegeli» eken dep tamsansa, oǵash qylyq kórsetken balany «tárbıesiz, ónegesiz» dep sógetin bolǵan. Qazaqta eń aýyr sóz – «tárbıesiz», «tárbıe kórmegen» degen sóz. Árıne, qaı qazaq balam jaman bolsyn desin, demeıdi de, sondyqtan da betimdi jerge qaratpa dep ósıet tárbıesin aıtyp otyratyny belgili.