Jyl basynan beri Almatydaǵy túrmege 24 adam tyıym salynǵan zattardy tasymaldaǵan
Qylmystyq-atqarý júıesiniń mekemelerinde, arnaýly mekemelerde ustalatyn adamdarǵa paıdalanýǵa tyıym salynǵan zattardy jasyryp nemese kez kelgen tásilmen berýge árekettengen adamdar QR ÁQBtK-niń 481-babynyń 1-bóligine sáıkes ákimshilik jaýapqa tartylady, eskertý jasalady nemese 10 aılyq eseptik kórsetkish mólsherinde aıyppul salynady, dep habarlaıdy Almaty-akshamy.kz.
Al osy baptyń birinshi bóliginde kózdelgen ákimshilik jaza qoldanylǵannan keıin bir jyl ishinde qaıtalap jasalǵan áreketteri úshin 20 aılyq eseptik kórsetkish mólsherinde aıyppul salynady nemese 30 táýlikke deıingi merzimge ákimshilik qamaýǵa alynady.
Osyndaı jazalarǵa qaramastan, jyl basynan beri Almaty qalasy boıynsha QAJ departamentiniń №72 mekemesinde tergeý-qamaýyndaǵylar men sottalǵandarǵa tyıym salynǵan zattardy ótkizýge árekettengen 24 adam ustaldy. Onyń ishinde 4 áıel adam bar. Atalǵan faktilerdiń ishinde 14 fakt №72 mekemeniń front-keńsesi arqyly ótpekshi bolǵandardan anyqtaldy. Bir ókinishtisi, quqyqbuzýshylardyń arasynda 8 qoǵamdyq qorǵaýshy, 1 advokat bar.
Sondaı-aq sottalǵandarmen jáne tergeý qamaýyndaǵylarmen qysqamerzimdi kezdesýge kelgen 5 adamnyń da osyndaı zańsyzdyqtary anyqtaldy. Sońǵy kezde tyıym salynǵan zattardy poshta arqyly jiberetinder de kezdesýde. Atap aıtqanda olar 14 telefon, 34 500 teńge, 1,5 lıtr spırttik ishimdik, 11 basqa da zattardy (SIM-karta, USB-shnýr, qýattaǵysh quraly) ótkizýge áreket jasaǵan. Mekeme aýmaǵyna tyıym salynǵan zattardy ótkizbekshi bolǵandardyń barlyǵyna hattama toltyrylyp, Almaty qalasynyń ákimshilik quqyqbuzýshylyq jónindegi mamandandyrylǵan aýdanaralyq sotyna joldandy.