Mamandar osylaı dep dabyl qaǵýda
Almatyda energetıkalyq sýsyndy tutyný saldarynan hırýrgıalyq patologıasy bar naýqastar sany artqan, dep habarlaıdy Almaty-akshamy.kz Stan.kz aqparat agenttigine silteme jasap.
Bul týraly №4 qalalyq klınıkalyq aýrýhananyń joǵary sanatty dárigeri, S.Asfendıarov atyndaǵy QazUMÝ №1 hırýrgıalyq aýrýlar kafedrasynyń profesory Abylaı Baımahanov aıtty,.
Dárigerdiń aıtýynsha, keıingi kezde asqazan aýrýyna shaldyqqan naýqastar sany artqan. Budan basqa túrli dıagnozben túsken pasıentter de bar. Mamandar keıbir aýrýdy der kezinde anyqtaý qıynǵa bolǵandyqtan hırýrgıalyq dıagnostıkalyq ádisti qoldanyp jatqanyn aıtady.
«Klınıkamyzdyń jedel hırýrgıa bólimshesine naýqastar kún saıyn qabyldanady. Keıingi kezde jastar arasynda asqazan aýrýlaryna shaldyqqandar jıi anyqtalyp otyr. Naqtyraq aıtsaq, asqazan oıyq jarasy men asqazannan qan ketýdiń aýyr túri. Sondaı-aq qabyldaý bólimine ishtiń túsiniksiz aýrýy, júıke qozýy, mazasyzdaný jáne júrek aınýy mazalaǵan naýqastar da júginedi. Munyń bári abdomınaldy aýrýlardy dıagnostıkalaýda qıyndyq týdyrady. Sondyqtan hırýrgtar aýrýdy anyqtaý úshin dıagnostıkalyq laparoskopıaǵa júginetin sátteri bolady», – deıdi profesor Abylaı Baımahanov.
Qabyldaýǵa kelgen ár adammen sóılesip, zertteý júrgizgen kezde, kóbi kúnine 3-4 quty energetıkalyq sýsyn ishkenin aıtqan. Al dárigerler gazdalǵan sýsyn quramyndaǵy shamadan tys qanttan asqazan titirkenip, aýyrsynýy jáne bul meteorızmge ákelýi múmkin ekenin aıtady.
«Energetıkalyq sýsynnyń quramyndaǵy kofeın aýyr gastrıtke shaldyqtyrýy múmkin. Saldarynan asqazan, ishekte qabyný, aýyrsyný paıda bolyp, erozıa jáne qan ketý belgileri anyqtalyp jatady. Búginde árbir jasóspirim energetıkalyq sýsyndy kez kelgen saýda núktesinen satyp ala alady. Óskeleń urpaq energetıkalyq sýsynnyń zıany týraly bilýi kerek», – dep túsindirdi dáriger.
Maman ata-analarǵa balalaryn baqylaýǵa alýǵa keńes berdi. Sonymen qatar jasóspirimder de "birinshi baılyq – densaýlyq" ekenin eskergeni jón.