29-shy Respýblıkalyq «Jas qanat–2023» jas oryndaýshylar baıqaýynyń uıymdastyrýshylary aıtýly óner baıqaýyna daıyndyqtyń qalaı júrip jatqanyn habarlaıdy.
Sonymen, bıyl bul baıqaý erekshe formatta ótkeli otyr. Buryn «Jas qanat» úsh kún boıy «mınýs 1» fonogramsymen ótip kelse, bıyl jas talanttar ár saıysta ártúrli mýzykalyq súıemeldeýmen óner kórsetedi degen sheshim qabyldandy. Baıqaýdyń birinshi kúni olar óz ánderin Aleksandr Belákov jetekshilik etetin estradalyq-sımfonıalyq orkestrdiń súıemeldeýimen shyrqaıdy. Ekinshi kúni «mınýs 1» fonogramsymen óner kórsetedi. Al úshinshi kúni olardy gıtarıst, mýzykalyq óńdeýshi, kompozıtor, mýzykalyq prodúser jáne dırıjer Ilá Bashkatov basqaratyn, quramynda 6 ınstrýmentalshy, 4 úrmeli aspapshy jáne 3 bek-vokalıst bar bend súıemeldeıtin bolady. Buǵan deıin ótken «Jas qanatta» nebári 3 júldeli oryn bolsa, endi olar «Azıa daýysy» festıvali men «Jas qanat» baıqaýynyń negizin salýshylar – Murat Erǵalıev pen Aleksandr Ponomarev atyndaǵy Gran-prımen tolyǵyp otyr.
Sondaı-aq, bıylǵy «Jas qanat–2023» baıqaýy aıasynda «JAS QANAT – BALALAR» birinshi respýblıkalyq balalar shyǵarmashylyǵy baıqaýy ótedi. Jas daryndar eki atalym – vokal jáne sýret baıqaýy boıynsha baq synamaqshy. Baıqaý 1 maýsym – Halyqaralyq Balalardy qorǵaý kúnine oraı, dál sol kúni bastalady. Uıymdastyrýshylardyń málimetinshe, mektep oqýshylary «Sońǵy qońyraýdan» keıin Respýblıka saraıyna kelip, osy baıqaýdy tamashalaýyna bolady. Baıqaýdy eresekter men jas oryndaýshylar «Jas qanat» ánuranymen ashady.
Balalardyń sýret baıqaýy týraly birer sóz aıtsaq, irikteý kezeńinde «Azıa daýysy» degen sóz tirkesi neni elestetedi, sol týraly sýret salý tapsyrmasy berilgen edi. Balalardyń jumystary biz kútkennen de asyp tústi. Ondaǵy irikteýdiń qalaı ótip jatqanyn @azia.dauysy instagram paraqshasynan kóre alasyzdar. Eń qyzyqty jumystardy «Jas qanat–2023» baıqaýy ótetin Almatydaǵy Respýblıka saraıynyń foıesindegi kórmege qoıatyn bolamyz, –deıdi uıymdastyrýshylar.
Baıqaý barysynda foıede aty ańyzǵa aınalǵan halyqaralyq «Azıa daýysy» festıvali fotomuraǵatynyń kórmesi, balalar sýret kórmesi jáne «Azıa daýysy–2023» sahnalyq eskızderiniń kórmesi ótedi. Sahnalyq eskızder Júrgenov atyndaǵy Qazaq ulttyq óner akademıasynyń stýdentterine tapsyrylyp otyr. Úzdik eskız avtory 100 000 teńge júlde alady. Shoý tek sahnada ǵana emes, Respýblıka saraıynyń foıesinde tık-tokerlerge arnalǵan kıiz úı ornatylmaqshy.