«Úmit-2021» konkýrsynyń maqsaty – sottalǵandardy tabıǵattyń keremetin sezine alýǵa, sulýlyqqa degen qushtarlyǵyn arttyrýǵa tárbıeleý.
Almatyda sottalǵandar arasynda «Úmit-2021» baıqaýy ótti, dep habarlaıdy almaty-akshamy.kz Polisia.kz saıtyna silteme jasap.
Almaty oblysy boıynsha Qylmystyq-atqarý júıesi departamentinde jyldaǵy dástúr boıynsha sottalǵandardyń ónerin synǵa salatyn «Úmit» konkýrs-baıqaýy ótti. Sottalǵandar bul baıqaýda eki nomınasıa boıynsha, atap aıtqanda, qolóner buıymdaryn jasaý jáne sýret óneri boıynsha saıysqa tústi.
Bul konkýrs sottalǵandar arasynda da nebir sheberler men sýretshiler bar ekenin anyqtady. Atap aıtqanda, qolóner buıymdary boıynsha LA-155/6 mekemesinde jazasyn ótep jatqan A. atty jasóspirimniń qolynan shyqqan sýdyń ekpinimen qozǵalysqa túsetin «Ekskavator» ádilqazylar alqasynyń ádil baǵasyna ıe bolyp, birinshi oryndy ıelendi. Shprıs pen sýdy, gýashty qoldanǵan sheberdiń óneri onyń bolashaǵynan zor úmit kúttiretin mamandyq ıesi bolatynyna degen senimdi kúsheıtti.
Sýret óneri boıynsha júldeli orynǵa LA-155/18 mekemesinen sottalǵan S.-nyń salǵan «Garmonıa» atty kartınasy ıe boldy. Bul kórmege sottalǵan S.-nyń budan basqa da «Meniń janym», «Meniń armanym alys» atty sýretteri de qoıyldy.
«Sottalǵandar arasynda ótken «Úmit-2021» konkýrsynyń maqsaty sottalǵandardy tabıǵattyń keremetin sezine alýǵa, ónerdiń tylsymyn túsinýge, olardyń estetıkalyq túsinigin qalyptastyryp, aınalasyndaǵy sulýlyqqa degen qushtarlyǵyn arttyrýǵa tárbıeleý bolyp tabylady. Konkýrs jeńimpazdaryna belgilengen aqshalaı syılyq olardyń jeke shottaryna aýdarylatyn bolady», – dedi ádilqazylar alqasyna tórelik etken Almaty qalasy boıynsha QAJD bastyǵy D. Qanatbekov.
Sonymen qatar jeńimpaz sottalǵandar departament basshylyǵy tarapynan Maqtaý gramotalaryna ıe boldy.