QR Táuelsízdígíníń 30 jyldyǵyna «Órleu» bílíktílíktí arttyru ūlttyq ortalyǵy» aktsıonerlík qoǵamynyń fılıaly Almaty qalasy boıynsha pedagogıkalyq qyzmetkerlerdíń bílíktílígín arttyru ınstıtuty qyzmetkerleríníń ūıymdastyruymen «Kóptíldílík zamanauı bílím berudíń basymdyqtarynyń bírí retínde: jaǵdaıy men bolashaǵy» atty halyqaralyq ǵylymı-praktıkalyq onlaın-konferentsıya qazaq, orys, aǵylshyn, frantsuz, ózbek, ūıǵyr tílderínde óttí.
Konferentsıyanyń maqsaty – respublıkanyń bílím beru mekemelerínde kóptíldílíktí engízu boıynsha máselelerdí syndarly talqylau jáne tájírıbe almasu. Ís-sharany ūıymdastyruǵa atsalysqan seríktester – EQYŪ AŪJK, YuNESKO, AQSh Elshílígí, SDU, Reseıdíń Almatydaǵy Bas konsuldyǵy, Almaty qalasynyń bílím basqarmasy, Almaty qalasynyń Frantsuz alyansy.
Konferentsıyaǵa AQSh, Ukraına, Mońǵolıya, Tájíkstan, Frantsıya, Germanıya, Ózbekstan elíníń jetekshí unıversıtetterí men Ǵylym akademıyasynyń ókílderí qatysty.
Konferentsıyanyń plenarlyq májílísíníń moderatory – «Órleu» bílíktílíktí arttyru ūlttyq ortalyǵy» aktsıonerlík qoǵamynyń fılıaly Almaty qalasy boıynsha pedagogıkalyq qyzmetkerlerdíń bílíktílígín arttyru ınstıtutynyń dırektory Raısa Sadvakasova: «Bíz Qazaqstan Respublıkasy Táuelsízdígíníń 30 jyldyǵy qarsańynda kezdesíp otyrǵanymyzdy quanyshpen atap ótuge bolady – būl qazaq halqy úshín eń mańyzdy mereke! Bízdíń memleket kóp ūltty, 130-dan astam ūlt ókílderí tūrady. Barlyq etnostyń teń qatar ómír súruí, ūltaralyq bírlík, etnostardyń tíldík qūqyqtarynyń saqtaluy, bílím alu jáne shyǵarmashylyq qajettílíkterdí júzege asyru úshín tíldí erkín tańdaudy qamtamasyz etu – elímízdegí tíl sayasatynyń ózegí. Tílderdí meńgeru arqyly jańa bílímge qol jetkízemíz», – dep atap óttí.
Plenarlyq májílíste sóz alǵan konferentsıya qonaqtary – EQYŪ-nyń az ūlttar ísterí jóníndegí Joǵarǵy komıssarynyń Ortalyq Azıya bílím beru baǵdarlamasynyń Bílím beru máselelerí jóníndegí halyqaralyq sarapshy-konsultanty Atanasıya Stoyanova, Abylaı han atyndaǵy QazHQjÁTU qazaq fılologıyasy kafedrasynyń meńgerushísí, fılologıya ǵylymdarynyń kandıdaty, dotsent Aqbota Qonyrova jáne Tájíkstan, Monǵolıya, AQSh-tyń jetekshí unıversıtetterí men Ǵylym akademıyasynyń ókílderí bayandama jasap, elímízdíń tíl mamandary, ǵalymdar men ūstazdar konferentsıya ayasynda ózektí máselelerge aıryqsha toqtalyp óttí.
Tájíkstan ókílderí Tájíkstan Bílím akademıyasynyń vıtse-prezıdentí Irına Karımova jáne Abdurahman Djamı atyndaǵy Tájíkstan bílím akademıyasynyń Bílím berudí damytu ınstıtutynyń aǵa ǵylymı qyzmetkerí Barno Hakımova óz sózderínde ūlttyq tílde oqytylatyn mektepterdegí kóptíldílík baǵdarlamalardyń erekshelíkterín atap óttí.
M.Áuezov atyndaǵy Ońtústík Qazaqstan unıversıtetíníń professory Negmatjan Almetov óz bayandamasynda «jańashyldyq» sanatynan «jappaı tájírıbe» sanatyna kóshu, úshtíldí bílím beru baǵdarlamalaryn damytudyń jańa tetíkterín ízdeu jáne engízu turaly píkírín ortaǵa saldy.
Sonymen qatar, mońǵolıyalyq áríptester: doktor (Ph.D) Uhnaa Tuya, Pedagogıkalyq damu ortalyǵynyń ǵylymı qyzmetkerlerí Hııs Gansuh jáne Zaubaı Zulmıra óz sózínde kóptíldí bílím beruge qatysty saraptamalyq jūmystarynyń nátıjelerín bayandasa, Almaty qalasynyń A.Rozybakıev atyndaǵy №153 mektep-gımnazıyasynyń dırektory Shavkat Umarov ózí basshylyq jasaıtyn ūjymnyń jūmys tájírıbesímen bólístí.
Sóz kezegínde YuNESKO-nyń táuelsíz sarapshysy, PhD, QR Prezıdentí janyndaǵy Memlekettík basqaru akademıyasy fılıalynyń dotsentí Sáule Zeınolla halyqaralyq deńgeıdegí auqymdy jıynǵa qatysushylardy tíl máselelerí boıynsha yntymaqtastyqqa shaqyrdy.