Ózbekstannyń Sarmıshsaı memlekettik mýzeı-qoryǵyndaǵy shatqaldarda 10 myńǵa jýyq petroglıf bar
«Qazaqstandaǵy Tamǵaly tas petroglıfteri men Ózbekstandaǵy Sarmıshsaı qoryǵyndaǵy tasqa qashalǵan jazbalar arasynda uqsastyq bar», – deıdi ǵalymdar. Tamǵalyda kún tekti adamnyń beınesi kóp kezdesse, Sarmıshsaı petroglıfterinde buǵy men jabaıy ógizdiń sýretteri kóp basylǵan, dep habarlaıdy almaty-akshamy.kz
«Bul tastarǵa salynǵan buqalardy jergilikti jerde keziktirmeısiz. Tipti uqsaıtyndary da joq. Endi «Bul buqalar qaıda ketip qaldy?» degen saýal týyndaıdy. Buǵan qatysty ǵalymdardyń birneshe pikiri bar. Alǵashqysy – ekologıanyń kúrt ózgerýi. Buqalar jeıtin azyq taba almaı, qyrylyp qalýy múmkin. Al ekinshi pikir – bul tuıaqtylar Mońǵolıaǵa ketip qalǵan. Qazir sol elde shynymen de erekshe tuqymdy buqalardy kórýge bolady», - deıdi Sarmıshsaı memlekettik mýzeı-qoryǵynyń dırektory Ramazon Egamov.
Ózbekstannyń Naýaı oblysynda ornalasqan Sarmıshsaı memlekettik mýzeı-qoryǵyndaǵy shatqaldarda 10 myńǵa jýyq petroglıf bar. Kóbi qola dáýirine tıesili bolǵanymen, paleolıtten bastap saq kezeńinde salynǵan sýretter de kóptep kezdesedi.
«Bul shatqaldardy Norvegıa, Qazaqstan, Reseı elderiniń ǵalymdary birneshe márte kelip zerttegen. Tastaǵy petroglıfterden túrli kezeńde ómir súrgen adamdardyń mádenıetin kórýge bolady. Máselen, bılep jatqan eki adamnyń sýretteri bar. Iaǵnı sol kezde taıpalardyń óz mýzykasy bolǵandyǵyn, mádenıettiń damyǵandyǵyn ańǵartady», - Sarmıshsaı memlekettik mýzeı-qoryǵynyń dırektory Ramazon Egamov.
Skıfterdiń dúnıetanymynan mol maǵlumat beretin eskertkishtiń ashylmaǵan qupıasy áli kóp. Búginde ol memleket qorǵaýyna alynǵan.