Tilder merekesi Qazaqstanda jyl saıyn qyrkúıektiń birinshi jeksenbisinde atalyp ótedi.
Meni jas býynnyń ókili retinde túrli ult ókilderiniń qazaq tilinde sóıleıtini qýantady, dedi Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń Almaty qalasy boıynsha múshesi Anna Torosán. Bul pikirimen ol Tilder merekesine arnalǵan quttyqtaýy barysynda bólisti, dep habarlaıdy Almaty-akshamy.kz.
Adamzat qansha ǵumyr súrse, til de jer betinde sonsha ómir súredi. Birneshe jyldar boıy ujymdar tilderdi qalyptastyrdy, olardyń kómegimen adamdar osy kúnge deıin bir-birimen sóılese alady jáne qarym-qatynas jasaı alady, óz oılaryn, sezimderi men tilekterin bildire alady.
«Qazirgi ýaqytta Qazaqstan Respýblıkasynyń aýmaǵynda óziniń kóp ǵasyrlyq tarıhy, mádenıeti, salt-dástúri, ádet-ǵurpy, sondaı-aq óz tili bar 120-dan astam túrli etnos ókilderi turady. Elimizdiń árbir azamaty ana tilin qoldanýǵa, qarym-qatynas, tárbıe, oqý, sondaı-aq shyǵarmashylyq tilin erkin tańdaýǵa quqyly», - deıdi Qazaqstan halqy Assambleıasynyń «Jańǵyrý joly» respýblıkalyq jastar qozǵalysynyń Almaty qalasy boıynsha múshesi Anna Torosán.
Anna ózi armán etnosynyń ókili, biraq ana tilinen basqa, ol qazaq jáne orys tilderin biledi.
«Meniń zamandastarym bizdiń memleketimiz Qazaqstan halqynyń kez-kelgen tilin úırený men damytý úshin jaǵdaı týǵyzýǵa qamqorlyq jasaıdy dep sanaıdy. Máselen, bizdiń elimizde ártúrli etnostardyń tilderin úıretetin birneshe mektep jumys isteıdi. Meniń oıymsha, bul adamnyń shynaıy bostandyǵy. Jáne bul bizge, barsha qazaqstandyq jastarǵa úlken maqtanysh. Meni jas býynnyń ókili retinde túrli ult ókilderiniń qazaq tilinde sóıleıtini qýantady. Meniń ortamda mundaı jastar jetkilikti, olar: armándar, aýǵandyqtar, orystar, ýkraındar jáne basqalar. Al men úshin Qazaq tili – halyqtyń rýhanı ómiriniń búkil tarıhy kórinis tabatyn álemdegi eń ádemi tilderdiń biri», - dedi Anna.
Qazir ol múmkindiginshe kóp til úırenýge tyrysýda.
Elbasy Nursultan Nazarbaev Qazaqstan halqy Assambleıasynyń HHİİ sesıasynda sóılegen sózinde: «Kóp tildi bilý – jahandyq ómirge joldama. Bul adam ómirindegi jetistik qaǵıdasy» ekendigin aıtqan bolatyn.
«Sondyqtan men aǵylshyn, ıtalán, sonymen birge Otanymnyń tili - qazaq tilin úırenip júrmin. Men demalys kúnderi armán mádenı ortalyǵynda ótetin memlekettik til kýrstaryna baramyn, qazaq tilinde sóıleıtin dostarymmen kóbirek sóılesýge tyrysamyn», - deıdi jas belsendi.