Bıyl Túrksib aýdanyndaǵy úsh myńǵa jýyq qala turǵyny ortalyq sýmen jabdyqtalady.
Muny aýdan turǵyndarymen kezdesýde qala ákimi Erbolat Dosaev aıtty, dep habarlaıdy Almaty-akshamy.kz.
Úsh shaǵynaýdanda jáne aýdan kósheleriniń birinde 138,2 shaqyrym sý qubyry jáne káriz jelileri tartylyp jatyr. Búginde 62,2 shaqyrym jeli salyndy. Jyl sońyna deıin taǵy 22,7 shaqyrym jeli iske qosylady. Bıyl "Shýaqty" jáne "Jas Qanat" shaǵynaýdandaryndaǵy 2,7 myń turǵyn, sonymen qatar Zakarpatskaıa kóshesi ortalyqtandyrylǵan sýmen jabdyqtalyp, káriz júıesine qosylady.
"Tómengi besjyldyq" shaǵynaýdanyndaǵy jeliler qurylysy kelesi jyly aıaqtalady. Búginde bul jumys 40%-ǵa oryndaldy, 98,4 shaqyrymnyń 40 shaqyrym jelisi salyndy. Osylaısha, kelesi jyly "Tómengi besjyldyq" shaǵynaýdanynyń 4,1 myń turǵyny qalalyq jelilerge qosylady.
"Álmerek", "Qaırat", "Maıak" shaǵynaýdandary úshin 55,8 shaqyrym jeli, onyń ishinde 30,7 shaqyrym sýmen jabdyqtaý jáne 25,1 shaqyrym káriz jelileriniń qurylysyna JSQ ázirlendi. Qurylys 2023 jyldyń II toqsanynda bastalady.
Ótinishterdi eskere otyryp, aldyńǵy kezdesý barysynda ortalyq sý burý jelilerimen qamtylmaǵan aýdannyń 7 ýchaskesi (9,5 myń úı) tekserildi. 2023 jyly káriz jelilerin salýǵa JSQ ázirlenedi.