Túrksíb audanynda ınjenerlík ınfraqūrylymdy jańǵyrtu baǵdarlamasy belsendí túrde júzege asyrylyp jatyr. Aqan serí - Sholohov - Seıfullın kóshesíníń aumaǵynda su qūbyry men káríz júıesíníń qūrylysyn qamtıtyn úlken joba bastaldy. Óńírlík kommunıkatsıyalar qyzmetí ūıymdastyrǵan baspasóz turynda audan ákímí osy jūmystyń ayaq alysyn bayandady.
Joba ayasynda 18,8 shaqyrym su qūbyry jelísí (onyń íshínde 6,7 shaq magıstraldyq jáne 12,1 shaq abonenttík jelí) jáne 27,9 km káríz jelísí (15,7 km magıstraldyq jáne 12,2 km abonenttík jelí) salynady. Būl joba 1200 abonentke sapaly kommunaldyq qyzmet kórsetuge múmkíndík bermek. Qazylǵan 50 myń sharshy metr alańdaǵy asfalt jabyny qalpyna keltíríledí. Qūrylys jūmysy 15 aıǵa sozylady.
Osy jyldyń sońyna deıín «Nıjnyaya Pyatıletka», «Qaırat» shaǵyn audandarynda, sondaı-aq Qrasnogorskaya, Súıínbaı kóshesí men Asylbekov–Sobolev-Sarymoldaev aumaǵynda 143,4 shaqyrym su qūbyry men 53,1 shaqyrym káríz jelísíníń qūrylysy ayaqtalady.
Būǵan qosa, Tūqaı - Norılskıı - Poddubnyı - Dıkson kóshesíníń aumaǵynda 9,4 shaqyrym su qūbyry men 1,1 shaqyrym káríz jelísíníń qūrylysy jalǵasyp jatyr, būl 2026 jyldyń mamyr aıynda ayaqtalady. Sonymen qatar jańa jobalar da ázírleníp jatyr: «Nıjnyaya Pyatıletka» shaǵyn audanynda ekí kárízdík sorǵy stantsıyasynyń qūrylysy josparlanyp, jūmys 2025 jyldyń jeltoqsanynda ayaqtalmaq. Rysqūlov - Jansúgírov - Sholohov - Seıfullın kóshesíníń aumaǵynda jelí qūrylysyna oń saraptama qorytyndysy alynǵan, al «Nūrshashqan» shaǵyn audanyndaǵy qamtylmaǵan aumaqtarǵa joba ázírleníp jatyr, ony bıylǵy qarashada ayaqtamaqshy.
«Qazír bíz su qūbyry men káríz júıelerín jańartu men salu jaǵyna erekshe kóńíl bólíp otyrmyz. Aldaǵy jyldary, ásírese jeke tūrǵyn úı qūrylysy ornalasqan aumaqtardy ortalyqtandyrylǵan káríz júıesímen tolyq qamtudy kózdep otyrmyz. Qazírgí uaqytta Túrksíb audanynda bes joba íske asyp jatyr. Aldaǵy 3-4 jylda audanymyzdaǵy 25 myń jeke tūrǵyn úı sumen, káríz júıesímen qamtamasyz etíledí», – dedí Baqytjan Aqjarov.
Osylaısha, Túrksíb audanynda ınjenerlík jelílerdí jańǵyrtu jūmystary qarqyndy júrgízílíp, myńdaǵan tūrǵyn úshín sapaly kommunaldyq qyzmettíń kepílíne aınalmaq.