Túrksib aýdany turǵyn úı qoryn ońaltýdy kózdeıtin úlken baǵdarlamany iske asyra bastady. Aýdandaǵy 582 úı tozǵan dep tanylyp, olardy birtindep buzyp, ornyna osy zamanǵy kópqabatty turǵyn úı salmaq. 8 negizgi aýmaqty qamtıtyn baǵdarlamany úlken qurylys kompanıalarymen birlesip qolǵa alǵan. Óńirlik komýnıkasıalar qyzmeti uıymdastyrǵan baspasóz týry barysynda Túrksib aýdanynyń ákimi Baqytjan Aqjarov osylaı dedi.
Renovasıa belsendi júrip jatqan ýchaskeniń biri – Saýranbaev – Moldaǵalıev – Tolstoı – Chernyshevskıı kósheleri arasyndaǵy aýmaq. Munda eski 3 úı buzylyp, ornyna 152 páterden turatyn 7 jańa kópqabatty turǵyn úı salyndy, onyń 37-si turǵyndardy kóshirý baǵdarlamasy aıasynda berildi. Jaqyn arada taǵy eki úıdi buzyp, segiz jańa turǵyn úı salmaq.
«Qazir, mysaly, biz «Istorıa» turǵyn úı kesheniniń qurylys alańynda turmyz. Bul kvartalda eki-aq eski úı qaldy. Bir úıdiń turǵyndaryn túgel kóshirdik. Ekinshisimen renovasıa baǵdarlamasyna qatysý sharty boıynsha kelissóz júrgizip jatyrmyz. Buǵan deıin osyndaǵy úıler súrilip, ornyna jańa úıler salýdy bastaǵanbyz. Salynǵan úıdiń bári eski turǵyn úılerdi ońaltý jobasy aıasynda boı kóterip jatyr», – dedi Baqytjan Aqjarov.
2021 jyldan beri baǵdarlama aıasynda Túrksib aýdanynda 28 eski úı buzylyp, ornyna 17 osy zamanǵy kópqabatty turǵyn úı salyndy.
Búginde 500-den astam menshik ıesi jańa, jaıly ári qaýipsizdik jáne sapa talaptaryna saı keletin páterlerge kóshirildi.
«Aısultan» holdıńtik kompanıasy dırektorynyń orynbasary Ergen Bekturovtyń aıtýynsha, kóshirý baǵdarlamasyna qatysqan turǵyndardyń jaǵdaıy edáýir jaqsarǵan.
«Biz kez kelgen jaǵdaıda turǵyndarǵa úlkenirek baspana beremiz. Bólmeniń sany boıynsha alady, zań boıynsha. Burynǵy úıler barak bolǵan, eń úlkeni – 46 sharshy metr. Keı turǵyndar ony 3-4 bólmege bólip paıdalanǵan. Biz sol bólmeniń sanyna qaraı páter beremiz. Mysaly, bizdiń keshende bir bólmeli páterdiń ózi 33 sharshy metrden bastalady. Eger turǵynnyń eki bólmeli páteri bolsa, biz oǵan eki bólmeli páter usynamyz, ol keminde 56 sharshy metr», – dedi ol.
Aldaǵy ýaqytta Túrksib aýdanynda taǵy 181 jańa úı salynyp, qalada qosymsha 5640-tan astam páter paıda bolady.
Túrksib aýdanyndaǵy renovasıa baǵdarlamasy turǵyndardyń ómir sapasyn arttyryp, eski úılerden arylýǵa baǵyttalǵan.