Negizgi maqsat – týrıserdi tartý, kásipkerlikti damytý.
Túrkistannyń mádenı-rýhanı ortalyǵynda qolónershiler sheberhanasy bar teńdessiz týrısik keshen salynady, dep habarlaıdy Almaty-akshamy.kz oblystyq ákimdikke silteme jasap.
Qazirgi josparǵa sáıkes, keshende ulttyq naqyshtaǵy biregeı qolóner buıymdaryn daıarlaıtyn jáne qolóner tehnologıasyn oqytatyn iri sheberhana salynady.
"Jańa joba Túrkistan oblysynyń ákimi Darhan Satybaldynyń tóraǵalyǵymen ótken basqosýda talqylandy. Qolónershiler qalashyǵynyń jalpy aýmaǵy – 9 myń sharshy metr. Bul joba áli de tereń talqylanyp, tıisti sheshim qabyldanady", - deıdi ákimdik mamandary.
Sondaı-aq, jańa qalashyqta qonaqúıler men as úıler salynady. Kórme nemese Showroom ornalasady. Aldaǵy ýaqytta óńirde qolónershilerge qoldaý kórsetý arqyly jumys oryndaryn ashý, týrızmdi damytý sharalary da josparlanyp otyr.