«Neke tour» respýblıkalyq baıqaýdyń jeńimpazdary – erli-zaıypty on bes jup neke qıý úshin Qazaqstannyń rýhanı astanasy Túrkistanǵa joldama alady. Sonymen qatar jeńimpazdar qurmetine romantıkalyq keshki as, fotosessıa jáne mádenı baǵdarlama uıymdastyrylady, dep habarlaıdy Almaty-akshamy.kz
Neke qıý – qazaq halqynda keń qoldanys tapqan, sharıǵat jolymen oryndalatyn dástúr. San ǵasyrdan beri bul dástúr berik nekeniń kepili bolyp keldi. Jastar bir keseden neke sýyn iship, adal bolýǵa ant beretin. Osylaısha ata-babalarymyz izgi nıet jáne qos júrektiń qalaýymen eki jastyń basyn qosqan.
Túrkistanda osynaý ádemi dástúr jandanyp jatyr. Open Turkistan týrısik-aqparattyq ortalyǵy Túrkistan oblysynyń Mádenıet jáne týrızm basqarmasymen birlesip, erli-zaıyptylar arasynda ótetin «Neke tour» baıqaýyn jarıalady. Baıqaý «Shanyraq», «Mahabbat», «Arý» jáne «Januıa» atty 4 nomınasıa boıynsha ótedi.
Baıqaý sharttary boıynsha, 3-9 sáýir aralyǵynda erli-zaıypty juptar neke-turkistan.kz portaly arqyly qatysýǵa onlaın-ótinim joldady. Endi baıqaý komısıasy Túrkistanǵa baryp, neke qıý rásimin ótip, sondaı-aq taqyryptyq fotosessıaǵa qatysa alatyn 15 jupty anyqtaýy kerek. Jeńimpaz juptar úshin qosymsha tegin reıs, qonaqúı jáne romantıkalyq keshki as uıymdastyrylady. Sondaı-aq, jas jubaılarǵa Túrkistannyń kórikti jerlerin aralap, qala boıynsha tegin ekskýrsıa uıymdastyrylady.
Baıqaý uıymdastyrlǵan kezeńde qatysýǵa Qazaqstannyń barlyq óńirinen derlik 345 jup ótinim qaldyrdy.
«Baıqaý týraly bilip, kóptegen erli-zaıypty jup qatysýǵa ótinim jibergenine qýanyshtymyz. Mundaı belsendilik jastardyń óz halqynyń mádenı jáne rýhanı qundylyǵyna degen qurmeti, sol salt-dástúrmen ómir súrýge degen qulshynysy baıqalady. Neke qıý rásiminiń qasıetti mán-maǵynasy baıandy ári baqytty otbasylyq ómirge jaqsy negiz bolady», – deıdi uıymdastyrýshylar.
«Neke tour» baıqaýynyń jeńimpazdary Qazaqstanda XIII–XIV ǵasyrlardaǵy qazaq eposynyń keıipkerleri – Qozy Kórpesh pen Baıan Sulýǵa arnalǵan ǵashyqtar kúni 15 sáýirde jarıalanady. Baıqaý nátıjesi uımdastyrýshynyń @_openturkistan_ paraqshasynda jarıalanady