Ataýly áleýmettik kómekti alyp tastaý eń jaqsy sheshim bolmaq.
Qazaqstan halyq partıasynyń májilistegi depýtattary ataýly áleýmettik kómekti alyp tastaýdy, onyń ornyna aı saıyn ár balaǵa 70 myń teńge járdemaqy tólep turýdy usyndy, dep habarlaıdy Almaty-akshamy.kz
Májilis depýtaty Gaýhar Tanashevanyń aıtýynsha, ataýly áleýmettik kómek kóp balaly otbasylar úshin naqty kómek bolyp turǵan joq.
"Qazaqstan halyq partıasynyń fraksıasy ataýly áleýmettik kómekti alyp tastaý qajet dep sanaıdy. AÁK-ke úmitker bolý úshin kópbalaly, jumys istemeıtin analarǵa júzdegen synaqtan ótý kerek. Ádette áıelder búrokratıa men memlekettik organdardyń áýre-sarsańynan sharshaıdy. AÁK-ti alyp tastaý eń jaqsy sheshim bolmaq. Onyń ornyna balalarǵa tólenetin járdemaqynyń mólsherin arttyrý qajet", - dedi Tanasheva vıse-premer Altaı Kólginovke joldaǵan depýtattyq saýalynda.
Depýtat ár balaǵa jumsaýǵa jetkilikti mólsherde biryńǵaı járdemaqy tóleý qajet dep sanaıdy.
"Biz eń tómengi jalaqy mólsherinde ár balaǵa aıyna 70 myń teńge memlekettik járdemaqy taǵaıyndaýdy qarastyrýdy usynamyz. Mysaly, 4 balaǵa beriletin járdemaqy 280 myń teńgeni quraıtyn bolady. Eki balaǵa 140 myń teńge taǵaıyndalady. Al qazir 4 bala 55 340 teńge járdemaqy alady. Ár balaǵa aıyna 13 826 teńge bólinedi. Bul áleýmettik qoldaýdyń aqylǵa qonymsyz mólsheri. Munda ınflásıanyń turaqty ósýi, ekonomıkalyq turaqsyz jaǵdaı, baspananyń joqtyǵy jáne halyqtyń osy sanatyndaǵy adamdardyń turaqty jumyspen qamtylmaǵany eskerilmegen", - deıdi Tanasheva.
Osyǵan baılanysty depýtat ataýly áleýmettik kómek jáne 18 jasqa deıingi biryńǵaı balalar járdemaqysyn esepteý ádistemesin qaraýdy surady.