Elimizdegi kóp balaly analardyń úshten biri Túrkistan oblysynda turady.
Bul jaıly halyqpen kezdesýde Qasym-Jomart Toqaev aıtty, dep habarlaıdy Almaty-akshamy.kz QazAqparatqa silteme jasap.
«Túrkistan oblysy – elimizdegi halyq eń tyǵyz qonystanǵan aımaq. Munda 2 mıllıonnan astam adam turady. Áleýmettik saladaǵy bastamalar ár azamattyń turmysyna ózgeris ákeledi. Oblysta apatty jaǵdaıdaǵy jáne úsh aýysymmen oqıtyn mektepter áli de bar. Memleket bul máseleni sheshýge barynsha kúsh salady. Sońǵy jyldary 83 jańa mektep paıdalanýǵa berildi. Qazir 59 mektep salynyp jatyr. Sebebi, elimizdiń árbir 7-shi sábıi osy óńirde dúnıege keledi. Olarǵa sapaly bilim ordalaryn salyp, jaǵdaı jasaý – mańyzdy mindettiń biri», - dedi Memleket basshysy.
Onyń aıtýynsha, ońtústiktegi 6 aýdanda 900 myńǵa jýyq adam turady. Demografıalyq ósim boıynsha Saryaǵash aýdany kósh bastap tur.
«Sondyqtan, osy aýdanda perzenthanasy bar medısınalyq keshen salýdy tapsyramyn. Oǵan qajetti qarjyny respýblıkalyq búdjetten bólý kerek. Munyń bári turǵyndardyń densaýlyǵyn jaqsartýǵa septigin tıgizeri sózsiz. Elimizdegi kóp balaly analardyń úshten biri Túrkistan oblysynda turatyny belgili. Sondyqtan, bul bastama sizder úshin de óte mańyzdy. Biz jastarǵa jan-jaqty qoldaý kórsetemiz. Olardyń kásipkerlik bastamalary úshin ósimi 2,5 paıyz bolatyn shaǵyn nesıe beriledi. Jastarymyz osyndaı múmkindikterdi utymdy paıdalanyp, óz kásibin bastaıdy dep senemin. Bir sózben aıtqanda, memleket zeınettegi qarıalar men besik terbetken analarǵa qoldaý kórsete beredi. Al, jalyndy jastarǵa ómirde óziniń laıyqty ornyn tabýǵa jaǵdaı jasaımyz», - dep qorytyndylady Qasym-Jomart Toqaev.