Prezıdent Túrkistan oblysyna jumys sapary barysynda óńir jurtshylyǵymen kezdesti.
Kezdesýde "Túrkistanǵa rýhanı jáne tarıhı elorda degen mártebe berý kerek", - dedi Prezıdent, dep habarlaıdy Almaty-akshamy.kz
Memleket basshysy kezdesýdegi sózin: «Túrkistan – Atajurtymyzdyń altyn qazyǵy. Túrkistan – bárimizdiń maqtanyshymyz, eki dúnıe esigi, er túriktiń besigi atanǵan búkil álemge tanymal qasıetti jer. Osy kıeli shahardyń tól tarıhymyzda aıryqsha orny bar. Túrkistan tórindegi Qoja Ahmet Iasaýı kesenesi – rýhanıatymyzdyń myzǵymas dińgegi», – dep bastady.
Sondaı-aq kóptegen tulǵalarymyzdyń osynda jerlengenin tilge tıek etti.
«Byltyr qalaǵa Túrki áleminiń rýhanı astanasy degen mártebe berildi. Bul Túrkistandy tutas túrki jurty erekshe qadirleıdi degen sóz. Al biz kıeli shahardy rýhanı jáne tarıhı elordamyz desek, durys paıym bolatynyna kúmánim joq. Sondyqtan Úkimet taıaý arada Túrkistan qalasyna osyndaı mártebe berý máselesine qatysty laıyqty sheshim qabyldaıdy dep oılaımyn. Qasterli shahar kóne zamannan beri ulttyń uıasy, qazaqtyń qara shańyraǵy bolyp keledi», – dedi Qasym-Jomart Toqaev.