Qazaqstan túrikterdiń ushqyshsyz ushaqtaryn shyǵaratyn alǵashqy shetel memleketi atandy.
Túrkıanyń áskerı tehnıka, onyń ishinde túrli markaly ushqyshsyz basqarylatyn ushaqtar óndiretin Turkish Aerospace kompanıasynyń bas dırektory Ómer Iyldyz Anadolu aqparat agenttigine ANKA ushqyshsyz ushaqtarynyń alǵashqy partıasy Qazaqstanǵa 20 maýsymda jetkiziletinin málimdegen, dep habarlaıdy Almaty-akshamy.kz
«Reaktıvti qozǵaltqyshy bar Kuzgun basqalaryna qaraǵanda aýyr, salmaǵy 100 kelige deıin jetedi. Ol salmaǵy 60-90 kelige deıingi oqtumsyqty kóterýge qaýqary bar. Onyń qatty otyndy qozǵaltqysh júıesi bar jáne áldeqaıda úlken qashyqtyqty eńseredi. ANKA Kuzgun-men aıdyń sońyna deıin jabdyqtalady», dedi ol.
Eske sala keteıik, 10 mamyrda Qazaqstan men Túrkıa áskerı-tehnıkalyq yntymaqtastyq týraly kelisimge qol qoıdy. Ankara tehnologıany tasymaldap, Qazaqstan armıasy úshin ushqyshsyz ushaqtarǵa tehnıkalyq qyzmet kórsetý jáne jóndeý úshin kadrlardy oqytady.
«Jańa kelisim baýyrlas Qazaqstanmen dostyq baılanysty odan ári nyǵaıta túsedi», - dep atap ótti túrik tarapy.
Túrkıanyń kvazısektorlyq «Túrik aeroǵarysh kásiporny» (TUSAŞ) bul ushqyshsyz apparatty 2004 jyly Túrkıa qarýly kúshterine arnap, qurastyra bastap, 2010 jyly alǵash synaqtan ótken. Ushqyshsyz ushaqtyń maksımaldy ushý salmaǵy 1700 kg jáne 350 kg-ǵa deıingi salmaǵy bar júkti kótere alady. Ushý ýaqyty 9000 metrge deıingi maksımaldy bıiktikte 30 saǵatqa deıin jetedi. Qanatynyń qulashy 7,5 metr, al uzyndyǵy shamamen 8 metr.