IýNESKO tarapynan jarıalanǵan jáne jyl saıyn maýsymnyń birinshi jeksenbisinde atap ótiletin Dúnıejúzilik tańǵy as kúni aıasynda Túrkıa Respýblıkasynyń Almatydaǵy Bas konsýldyǵy Túrik asqanasy aptalyǵyn uıymdastyryp, birneshe mańyzdy is-shara ótkizdi.
Qazaqstan Respýblıkasynyń Syrtqy ister mınıstrliginiń Almaty qalasyndaǵy Ókildigi men qurmetti konsýldyqtardyń qoldaýymen, sondaı-aq Intercontinental qonaq úıimen birlesip túrik dastarhanyn jaıdy. Atap aıtqanda, klasıkalyq túrik taǵamdarynan turatyn saltanatty keshki asqa dıplomatıalyq korpýs ókilderi qatysty.
Sonymen qatar, Bas konsýldyq rezıdensıasynda ótken arnaıy tańǵy as barysynda Almatydaǵy jetekshi ǵalymdar, ǵylymı uıymdar men, BAQ ókilderi jáne saraptamalyq ortalyqtardyń mamandary Túrik tańǵy asynan dám tatyp, baı mádenıetimen tanysty.
Túrkıanyń Almatydaǵy Bas konsýly Evren Múderrisoǵly óz sózinde túrik halqynyń tańǵy as dástúriniń ereksheligine toqtaldy. Ol bul merekeniń alǵash ret Túrkıanyń Van aımaǵynda bastalyp, búginde álemdik deńgeıdegi mádenı is-sharaǵa aınalǵanyn atap ótti. Bas konsýldyń aıtýynsha, túrik tańǵy asy – tek tamaqtaný rásimi ǵana emes, otbasylar men dostardy ǵana emes, jalpy adamdardy biriktiretin, qoǵamnyń tutastyǵyn bildiretin mańyzdy dástúr.
Bul is-sharalar Túrik tańǵy as mádenıetiniń jahandyq tanymaldyǵyn arttyrýǵa, sondaı-aq Qazaqstan men Túrkıa arasyndaǵy mádenı-dıplomatıalyq baılanystardy nyǵaıtýǵa baǵyttalǵan.